Unwaith eto ar C2 gafodd Huw Stephens gwmni dau adolygwr gonest, cas ond teg - y canwr Brychan Llyr (gynt o'r grwp Jess) a Gareth Potter o'r grwp Ty Gwydr! Y CD cyntaf ar stereo y ddau oedd albym newydd Epitaff - 'Angel', a dyma beth oedd gan y ddau i'w ddweud....

Epitaff - 'Angel'
Ers ffurfio 5 mlynedd, mae dilyniant y grwp Epitaff o Gaernarfon wedi tyfu a thyfu wrth iddyn nhw rhyddhau un EP (Geiriau), un albym (Un Cynnig) a perfformio mewn cannoedd o gigs led-led y wlad. Eleni, mae Epitaff yn dychwelyd gyda albym newydd o'r enw 'Angel'.

Unarddeg trac yn llawn o alawon swynol gyda dylanwadau gwerin, roc a jazz ydy 'Angel' - y traciau i gyd wedi'u cyfansoddi gan y canwr Ynyr Roberts. Yn ôl Brychan Llyr, "Mae wedi tyfu arna'i... mae'n gerddoriaeth naif, a dy' nhw ddim yn esgus bod yn rhywbeth na 'dyn nhw ddim a mae rhywbeth neis am byti hynna. Mae'n gerddorol, mae 'na alawon yna felly mae'n bosib gwrando arno fe a gadael gyda'r alawon yn mynd rownd yn eich pen."

Doedd Gareth ddim mor hoff ohoni: "Dwi'n ffeindio Epitaff yn grwp eitha 'depressing' a does dim lot o "joie de vivre", hwyl bywyd, ynddo fe...... Mae nhw'n gerddorion da, ond wi just yn ffendio fe'n 'depressing', a mae'n anodd gwrando ar mwy na 3 trac heb droi e off. Dwi'n cytuno 'da Brychan, ond eto dwi ddim yn licio fe... dyw e ddim y math o gerddoriaeth dwi'n licio beth bynnag."

Mae'r albym yn cynnwys deuawd gyda'r gantores Meinir Gwilym - 'Curiad', a roedd Brychan yn hoff iawn o lais y canwr Ynyr Roberts. "Mae rhywbeth am byti llais y canwr, sydd yn swnio fel bod rhywbeth wedi digwydd yn ei fywyd e sydd wedi bod yn galed, a mae hyn yn hala i fi uniaethu gydag e. Mae e'n drwm hefyd - does dim lot o stwff 'uplifting' arno fe, ond os galle nhw whare'r stwff yma'n fyw, yna galle nhw gael dipyn o lwyddiant."

Doedd yr albym ddim yn taro deuddeg i Gareth - "Mae grwpiau fel Radiohead yn gallu bod yn rili depressing ond eto yn hyfryd ar yr un pryd, ond does dim lot o brydferthwch yn y gerddoriaeth yma.... Swn i'n licio 1 neu 2 o ganeuon byddai'n codi o'r 'primeval sludge' sydd ynddo fe."

Mae Epitaff yn enwog am greu cloriau gwahanol i'w recordiau ac yng nghlawr y CD Angel mae 'na gyfres o gardiau post gyda lluniau o aelodau'r grwp a geiriau'r caneuon wedi'i printio ar bob un. Mae'r albym ar gael yn y siopau ar hyn o bryd, ac yn cael ei ryddhau ar label Gwynfryn Cymunedol.

Marciau Epitaff Angel
Brychan: 6.5/10 ("marciau ychwanegol i'r clawr gwahanol")
Gareth 5/10 ("Mae'n cael ei chwarae'n dda, ond dim byd grêt amdano fe")

Dewch yn ôl wythnos nesaf, i ddarllen adolygiad o 'Amheuthun', sef CD newydd y grwp jazz/ffync Ummh!