Nos Wener - Roedd yr Adam & Eve yn byrlymu yng nghanol y ddinas, gydag ystod eang o gefnogwyr y sîn roc Gymraeg yn ymgasglu am noson o hel atgofion am y dyddiau a fu. Blŵs a gafwyd gan Neil Rosser ar y cyfan, gyda rhai o'r hen ffefrynnau fel 'Nos Sadwrn Abertawe' ac 'Ochor Dreforys o'r Dre' yn boblogaidd gyda thorf y dafarn unwaith eto eleni. Er hyn, byddwn wedi hoffi clywed rhagor o'r clasuron a llai o'r blŵs. Roedd 'Crys' yn boblogaidd, a'r rhan fwyaf yn clywed eu roc am y tro cyntaf yn y ddinas ers blynyddoedd lawer. Dim ond ar Radio Cymru yr ydw i wedi eu clywed nhw, ond gwnes i fwynhau eu set egnïol oedd yn cynnwys clasuron fel 'Pendoncwyr' a 'Dyma'r Band Cymraeg'. Merched Becca agorodd y noson gyda'u roc gwerin unigryw unwaith eto eleni. Roedd eu perfformiad yn llawer mwy tynn a hyderus na'r llynedd, a'r clasuron yn llifo o 'Ynysoedd Môn' i 'Actores'.

Wrth i'r bobl hŷn rocio yn yr Adam & Eve, roedd ieuenctid Abertawe yn mwynhau gig yn Nhŷ Tawe gyda band lleol o Ysgol Gyfun Gŵyr, 'Yr Angen' ac Andrew Rhys Lewis. Os gellir ei farnu o glywed ei set ar y llwyfan acwstig nos Sadwrn, rwy'n siŵr ei fod wedi diddanu'r dorf a'u swyno gyda'i lais melodig a'i ddawn ar y gitâr. Fues i ddim yno gan fy mod i wedi aros yn yr Adam & Eve, ond mae pawb yn trafod y noson mewn ffordd gadarnhaol dros ben. Roedd y band ifanc 'Yr Angen' yn hyderus yn eu perfformiad o wyth o ganeuon gwreiddiol. Clywais fod nifer o wynebau hŷn ymhlith y dorf. Braf clywed fod rhai o'r staff yno'n cefnogi ac yn ail-gydio yn nyddiau eu hieuenctid efallai!!

Nos Sadwrn - Amgueddfa Genedlaethol y Glannau oedd y lleoliad ar gyfer prif noson y penwythnos. Ystafell wydr oedd y brif ystafell, gyda choridor o weithiau celf yn arwain at y caffi, sef lleoliad y llwyfan acwstig. Roedd hi'n rhyfedd gweld y bar yng nghanol yr holl baentiadau ar y muriau a'r arddangosfeydd niferus. Dyma leoliad llawn steil a roddodd elfen syfrdanol i'r noson. Roedd hi'n cymryd ychydig o amser i lenwi'r ystafelloedd ar ddechrau bob set, ond roedd hi'n braf fod gan y gynulleidfa'r opsiwn o aros mewn un ystafell neu gyfnewid bob yn ail. Fe weithiodd hyn yn effeithiol ar y cyfan. Gan amlaf, byddai'r bobl hŷn yn aros yn y caffi a'r ieuenctid yn rocio ger y prif lwyfan. Roedd tipyn o bob math o gerddoriaeth ar gael ar y noson, yn amrywio o roc gan 'Frizbee', roc a hip-hop gan 'Sibrydion' a chanu gwlad 'Cowbois Rhos Botwnnog'. Roedd nifer o fandiau ifanc ar y prif lwyfan yn ystod y noson, gan gynnwys 'Y Rei' sef band newydd Aron Pep Le Pew, a 'Merched Mecca' sydd yn hen gyfarwydd â pherfformio yn y ddinas.

Roedd y llwyfan acwstig yn gyfle i ymlacio i ffwrdd o'r prif lwyfan, gyda pherfformiadau cadarn gan Andrew Rhys Lewis, Huw Dylan, Gareth Phillips a Fflur Dafydd. Cafwyd set o ganeuon y gellir symud y traed iddynt gan Andrew Rhys Lewis oedd yn perfformio heno heb ei fand newydd, y 'Torpedos'. Roedd ei sgiliau chwarae gitâr yn rhyfeddol. Un o drefnwyr Tyrfe Tawe yw Huw Dylan, gynt o 'Gwerinos', a chafwyd set o ganeuon gwerin ganddo. Llwyddais i daflu ei lais i bob cornel o'r caffi, gan greu awyrgylch iasol. Dychwelodd Gareth Phillips i lwyfan Tyrfe Tawe unwaith eto eleni gyda'i gyfansoddiadau ei hun. Dyma un o dalentau newydd y sîn Gymraeg. Yn cloi'r noson ar y llwyfan acwstig oedd neb llai na Fflur Dafydd a'r 'Barf', Rhys James. Roedd Fflur ar ei gorau, yn llawn egni, bywyd a chyffro, a'r caffi bellach dan ei sang. Roedd hi'n anodd peidio symud i guriadau'r gitâr, a llais swynol Fflur yn taro deuddeg gyda'r fath draciau ag 'Ar Ôl Heddi' a'r e-sengl newydd 'Dala Fe Nôl'.

Trac yr ŵyl?
'Heyla' gan Frizbee. Dyma drobwynt y nos Sadwrn i fi, gyda'r cyffro'n cyrraedd ei anterth. Dyma weld a chlywed y dorf yn yr amgueddfa'n mwynhau'r arlwy o gerddoriaeth oedd ar eu cyfer yn y lleoliad soffistigedig hwn. Braf gweld Frizbee yn dychwelyd i Tyrfe Tawe unwaith eto a chlywed Ywain Gwynedd yn datgan fod yr ŵyl yn mynd o nerth i nerth.

Uchafbwynt yr ŵyl?
Gweld yr hen a'r ifanc yn cymysgu yn yr amryw leoliadau dros dridiau o'r gerddoriaeth Gymraeg orau yn enw gŵyl fwyaf cyffrous y De.

Y peth gwaethaf am yr ŵyl?
Byddwn wedi hoffi clywed mwy o ganu yn ystod y noson werin, gan ychwanegu hyd yn oed mwy o hwyl i'r noson. Hefyd, ar y nos Sadwrn (o safbwynt rhywun sy'n methu gwneud penderfyniadau!) er bod cael dau lwyfan yn beth da, roeddwn i'n teimlo bod yr amseriad rhwng y llwyfannau yn golygu nad oedd modd clywed pob un o'r caneuon, gan fod rhai o'r setiau'n gorgyffwrdd. Roedd cymaint o setiau da ar y noson, roedd hi'n drueni gorfod colli unrhyw un o'r caneuon.

Achlysur Roc a Rôl?
Gweld staff y bar yn yr amgueddfa'n agor poteli cwrw gydag agorwyr poteli Tyrfe Tawe, neu'r 'soch' fel y'i gelwir.

Beth sy'n aros yn y cof?
Huw Dylan yn canu 'Nos Fawrth yn Abertawe' ar y llwyfan acwstig. Mae'r gân yn anthem answyddogol i'r pwyllgor sydd wedi bod yn cwrdd bob nos Fawrth i drefnu'r ŵyl. Fydda i byth yn anghofio cerdded i mewn i'r amgueddfa am y tro cyntaf ar nos Sadwrn a chael fy synnu gan hyfrydwch y lle a pherffeithrwydd y lleoliad ar gyfer yr ŵyl.

Talent gorau'r noson?
Gyda'r amrywiaeth o gantorion a ymddangosodd ar yr amryw lwyfannau dros y penwythnos, mae'n anodd dewis un perfformiad unigol. Un set sydd yn sefyll allan yw 'Fflur Dafydd a'r Barf' ar y llwyfan acwstig yn yr amgueddfa. Roedd lleoliad Coffee Cesso yn gweddu'n berffaith i'w llais a set llawn egni a brwdfrydedd.

Marciau allan o ddeg ac Un gair am y gig?
9 - penwythnos llwyddiannus a rhywbeth ar gyfer pawb.

Un gair am y gig - Pendonciadwy!

Unrhyw sylwadau eraill? Cynghorion? Rhybuddion? Lincs Gwefan?
Tyrfe Tawe - gŵyl gerddoriaeth Abertawe, yn gosod y safon ar gyfer gwyliau eraill Cymru. Rwy'n clywed y bydd 'Yr Angen' yn chwarae tipyn fwy yn Nhŷ Tawe dros y misoedd nesaf, gydag amryw o ymddangosiadau yn gigs 'Gwener y Grolsch'. Rwy'n edrych ymlaen yn fawr at gael eu gweld nhw yno!

Gwefan Swyddogol Tyrfe Tawe
Galeri C2 o Tyrfe Tawe

Nid yw'r BBC yn gyfrifol am unrhyw wefan allanol y cysylltir iddi o'r tudalennau yma.