Yr adolygydd
Awen Schiavone

Awyrgylch
Disgo ysgol heb y dawnsio

Disgrifiwch y perfformiadau

Wyrligigs:
Yn dechrau'r noson oedd Wyrligigs. Mae'r triawd ifanc yma o Fethesda yn dda iawn chwarae teg. Doeddwn i ddim yn disgwyl perfformiad cystal ganddynt, ond cefais fy mhlesio'n arw. Maent yn amlwg dan ddylanwad pyncwyr a rocwyr megis Ramones a'r Clash. Roedd eu perfformiad yn egniol a thynn, ac ambell i gân yn reit catchy. Dwi'n edrych ymlaen i glywed mwy ganddynt, ac i'w gweld yn datblygu eu swn gwreiddiol eu hunain. Ond, dwi methu peidio a deud eu bod nhw'n ciwt (yn enwedig y basydd pymtheg oed!).

Jen Jeniro:
Yn chwarae ar eu 'home ground' roedd Jen Jeniro wedi denu mwyafrif y gynulleidfa yma heno. Roedd eu perfformiad yn arbenig o dda, a'u caneuon yn wreiddiol ac amrywiol. Mae'r band yn chwarae set o ganeuon o wahanol arddulliau, ac yn llwyddiannus tu hwnt yn eu cyfar o 'Iechyd Da' - Gorky's Zygotic Mynci. Mae'r ffefryn 'Canol y Ffordd' yn gân rap sy'n rhyw fath o gân serch i Bryn Fôn (!!) a'r lyrics yn ddoniol iawn! Mae ganddynt ambell i gân â churiad cryf, a chaneuon eraill â gitario talentog, ac mae clyfrwch geiriol yn un o'u prif nodweddion. Edrych ymlaen at glywed eu recordiad cyntaf yn fuan!

Sibrydion:
Dyma'r tro cyntaf i mi weld y brodyr Gwynedd gyda band llawn, ac ni chefais fy siomi. Dechreuodd eu set gyda 'Disgyn Amdanat ti'. Er na chawsant lawer o wrandawiad, fe chwaraeodd y band ar eu gorau, gan roi popeth mewn i'r perfformiad. Roedd eu perfformiad yn llawn egni, ac roeddent yn amlwg yn mwynhau. Chwaraesant nifer o oreuon eu halbwm 'JigCal' gan gynnwys 'Dafad Ddu' a 'Chiwawas', ac ambell i gân newydd oedd yn cynnal eu safon. Cafwyd caneuon bywiog a hwylus yn ogystal ag ambell i berl harmoniaidd. Roedd eu perfformiad yn broffesiynol iawn a'r holl ganeuon yn wych. Daeth eu set i derfyn gyda'r glasur 'Arthur' gan ddiweddu'r noson yn dda iawn.

Trac y noson
'Cymru, Lloegr a Llanrwst' gan Jen Jeniro - mae'n rhaid cael y glasur hon yn Llanrwst, a'r hogiau'n sicrhau fod eu perfformiad yn adlewyrchu ffresni caneuon Y Cyrff hyd heddiw.

Uchafbwynt y noson
'Cymru, Lloegr a Llanrwst' gan Jen Jeniro.

Y peth gwaethaf am y noson
Y gynulleidfa - y mwyafrif dan oed, a heb unrhyw ddiddordeb yn y gerddoriaeth, ac felly ddim yn cymryd unrhyw sylw o'r perfformiadau gwych ar y llwyfan.

Achlysur Roc a Rôl
Un dihiryn bach yn dawnsio i Sibrydion ar ben ei hun - chwarae teg!

Beth sy'n aros yn y cof?
Un dihiryn bach yn dawnsio i Sibrydion ar ben ei hun - chwarae teg!

Talent gorau'r noson
Methu dewis, Wyrligigs yn drawiadol, potensial mawr yn Jen Jeniro, a Sibrydion yn wych.

Marciau allan o ddeg
9/10 i'r bandiau, a 3/10 am bopeth arall!

Un gair am y gig
Chwil!

Unrhyw sylwadau eraill? Cynghorion? Rhybuddion?
Os cewch gyfle, ewch i weld y tri band yma, mae nhw'n bendant werth eu gweld yn fyw! Legion yn venue da i gynnal gigs, ond y gynulleidfa yn anffodus yn wael iawn heno.

Cysylltiadau'r we
Sesiwn Sibrydion i C2
www.jenjeniro.co.uk
Gwallgofiaid

Nid yw'r BBC yn gyfrifol am unrhyw wefan allanol y cysylltir iddi o'r tudalennau yma.