 |  Poppies, Amlder
Abertawe, Ionawr 2005
Alun Rhys Chivers
Lle a phryd
Gwener y Grolsch, Ty Tawe, Abertawe, Ionawr 28ain, 2005
Y bandiau
Poppies, Amlder a set 'stand-yp' gan Ceri Phillips
Awyrgylch
Naws ymlaciedig oedd i'r noson, ond fe aeth hi'n fywiocach wrth fynd ymlaen. Braf oedd gweld cynifer o bobl yno, yn enwedig nifer fawr o fyfyrwyr - roedd y lle'n wirioneddol llawn dop!! Dwi ddim yn cofio gweld cymaint o bobl yno erioed!! Ni siomwyd yr un ohonom!
Trac y noson
Mae'n anodd dewis un yn benodol - roedd set gyfan 'Poppies' yn wych.
Disgrifiwch y perfformiadau
Dechreuwyd y noson gyda set 'Amlder', sydd yn fand ifanc o Landeilo. Roedd dau brif leisydd, oedd hefyd yn chwarae'r gitâr, a drymiwr. Roedd eu set yn gymysgedd o ganeuon Cymraeg a Saesneg. Maen nhw'n sicr yn gerddorion talentog, ond roedd eu lleisiau'n rhy gryf i'r math o gerddoriaeth roedden nhw'n ei chwarae. Cafwyd addasiad gwreiddiol iawn ganddynt o 'Wonderwall', trac enwog 'Oasis'.Torrwyd ar y gerddoriaeth gyda set 'stand-yp' gan foi ifanc lleol, Ceri Phillips (sydd yn wyneb cyfarwydd iawn yn Nhy Tawe). Roedd ei berfformiad yn hyderus, a chryfhaodd wrth fynd ymlaen. Mae'n cryfhau gyda phob perfformiad. Roedd tipyn o'i ddeunydd wedi'i seilio ar Dreforys, lle mae'n byw. Roedd ei jôcs yn agos iawn at yr asgwrn ar adegau, ond roedd ei agwedd tafod-yn-ei-foch yn llwyddiannus! Ymatebodd y dorf yn dda iddo drwy'r set. Mae talent ym myd comedi amgen Cymraeg yn brin iawn. Gydag ychydig mwy o gigs, fe allai greu marchnad newydd a gosod sylfaen i gomediwyr ifainc eraill. Gwyliwch mas amdano yn y dyfodol! Cafwyd agoriad hyderus gan brif atyniad y noson, sef 'Poppies', band ifanc sydd wedi'i leoli yn Aberystwyth, gydag un aelod o'r band, Eifion, yn dychwelyd adre' am y gig. Roedd eu set yn llawn roc weddol drwm. Mae'r band yn parhau i fynd o nerth i nerth, a sylwyd bod eu perfformiad wedi cryfhau unwaith eto ers ymddangos yn 'Tyrfe Tawe'. Maen nhw'n sicr yn fand egnïol a dawnus â ganddyn nhw ddyfodol disglair.
Uchafbwynt y noson
Perfformiad 'Poppies' - gwefreiddiol!
Y peth gwaethaf am y noson
Roedd perfformiad 'Amlder' yn siomedig, ond mae digon o amser am welliant eto.
Achlysur Roc a Rôl
Gweld pa mor hyderus oedd aelodau'r 'Poppies' ar y llwyfan - "We are the Poppies from Aberystwyth!"
Beth sy'n aros yn y cof?
Ceri Phillips - ddim i'r gwangalon!!!
Talent gorau'r noson
Poppies
Marciau allan o ddeg
8
Un gair am y gig
Unigryw!
Unrhyw sylwadau eraill? Cynghorion? Rhybuddion?
Dewch yn gynnar i'r 'Gwener y Grolsch' nesaf i osgoi siom - mae'n debygol o fod yn llawn!
| |
Amserlen C2:
Cysylltiadau, artistiaid, bandiau...