1). Lle a phryd
Ty Tawe, Stryd Christina, Abertawe, Hydref 29ain

2). Y bandiau
Andrew Rhys Lewis a'i fand; Mattoidz.

3). Awyrgylch
Roedd yr ystafell yn llawn am y gig fisol hon, ac roedd cymysgedd o bobl yn y dorf - myfyrwyr, cefnogwyr y bandiau, pobl ifainc Abertawe, ac roedd hyd yn oed ambell un enwog yno, gan gynnwys cyflwynydd C2, Ian Cottrell a'r gwleidydd, Adam Price. Ar nos Wener y Grolsch, Ty Tawe yw'r lle i fod. Pylwyd y goleuadau ar ddechrau'r noson, gan greu naws briodol ar gyfer Calan Gaeaf. Aeth pawb i hwyl y noson a chafwyd sawl un yn dawnsio erbyn set Mattoidz.

4). Trac y noson
Heb os, 'Tan y Tro Nesa', cân Mattoidz. Mae pawb yn gyfarwydd â'r gân ac mae'n adlewyrchu ymweliadau cyson y band â Thy Tawe eleni. Buon nhw yno'n ddiweddar i wneud set acwstig wych i 'Tyrfe Tawe', wrth gwrs.

5). Disgrifiwch y perfformiadau
Cafwyd roc a rôl gan Mattoidz, gyda pherfformiad hynod o fywiog a thrwm o 'Dyn Telesales', eu sengl newydd. Maen nhw'n sicr yn gwybod sut mae diddanu'r dorf! Am gerddorion!!! Roedd Andrew Rhys Lewis yn hyderus iawn o ystyried ei fod yn newydd i'r sîn. Roedd yn berfformiad egnïol a bywiog, os nad ychydig yn drwm. Byddwn i'n hoffi ei glywed yn acwstig, yn enwedig yn yr ystafell fechan hon.

6). Uchafbwynt y noson
Roedd pawb yn barod am barti, a dyna a gafwyd. Roedd yna 'buzz' enfawr yn y lle, a braf gweld bod cerddoriaeth Gymraeg yn Abertawe yn mynd o nerth i nerth.

7). Y peth gwaethaf am y noson
Er gwaethaf perfformiad gwefreiddiol gan Mattoidz, roedd eu cerddoriaeth yn drwm ar adegau, ac roedd hynny'n tynnu rhywbeth i ffwrdd o'r lleisiau.

8). Achlysur Roc a Rôl
Dau beth sy'n dod i feddwl - y cyntaf yw Hefin, canwr Mattoidz, yn dweud 'Nos da. Diolch yn fawr' ar ddiwedd y trac gyntaf - fe barhaon nhw beth bynnag! (maen nhw'n dipyn o jôcars!!). Y llall oedd drymar y band yn taflu'r prennau i'r dorf ar ddiwedd y noson - roc a rôl go iawn!!!

9). Beth sy'n aros yn y cof?
Perfformiad trydanol Mattoidz o'r trac 'Tan y Tro Nesa' - dyma nhw ar eu gorau!

10). Talent gorau'r noson
Andrew Rhys Lewis - cofiwch yr enw!

11) Marciau allan o ddeg
9/10 am y gig
10/10 i Fenter Iaith Abertawe am drefnu'r noson!

12). Un gair am y gig
Ffab!!!

13). Unrhyw sylwadau eraill? Cynghorion? Rhybuddion?

Da gweld cymaint o wynebau newydd mewn gig Cymraeg yn Abertawe - mae'r sîn ar gynnydd yma. Doedd fawr iawn o le i symud! Peidiwch â methu dwy gig nesaf Gwener y Grolsch - Ashokan ar Dachwedd 26ain a Neil Rosser a'r Band ar Ragfyr 10fed.