Beth yw alcohol? Mae'r alcohol rydyn ni'n ei yfed yn cael ei wneud trwy ffermentio neu stilio ffrwythau, llysiau a grawn. Dyna pam ei fod e'n blasu mor wahanol. Mae alcohol pur neu 'ethyl alcohol' yn glir fel dŵr.

O'r holl gyffuriau mae pobol yn eu defnyddio heddi i newid eu hwyliau a'u tymer, alcohol yw un o'r rhai cryfa sydd ar gael.

Sut mae alcohol yn gwneud i ti deimlo? Mae alcohol yn gwneud i ti ymlacio, ac mae'n gwneud i ti deimlo'n hapus ac yn hyderus hefyd.

Dyw yfed gormod ddim yn brofiad pleserus. Ma'r stafell yn troi, ti'n teimlo'n sâl, ti'n methu siarad yn glir, a ti'n methu cofio pethau. Mae rhai pobol yn mynd yn gecrus ac yn gas ar ôl yfed.

Y diwrnod ar ôl sesiwn yfed fawr, mae'n debyg y bydd 'da ti ben tost neu 'hangover'. Falle byddi di'n teimlo'n sâl, yn sychedig, yn flinedig ac ychydig yn isel.

Sut mae alcohol yn effeithio ar dy iechyd? Mae'r llywodraeth wedi cyhoeddi cyngor ar faint o alcohol y mae'n ddiogel i'w yfed. Dylai dynion dros 18 oed ddim yfed mwy na 21 uned yr wythnos, a dylai merched dros 18 oed ddim yfed mwy nag 14 uned yr wythnos. Mae faint o alcohol y mae'n ddiogel i bobol ifanc dan 18 oed ei yfed yn llai eto. Cofia mai cyngor am faint o alcohol y mae'n ddiogel i'w yfed mewn wythnos yw hwn - dyw yfed dy unedau i gyd mewn un sesiwn ddim yn iach o gwbl.

Mae 1 uned yr un peth â hanner peint o gwrw gwan, ac mae 2 uned yr un peth â photel o alcopop.

Os byddi di'n yfed alcohol, mae'n fwy tebygol y byddi di'n cael damwain o ryw fath neu'n gwneud rhywbeth y byddi di'n ei ddifaru y diwrnod wedyn. Arhosa gyda ffrindiau fydd yn cadw llygad arnot ti.

Alcohol yw'r cyffur mwya cyffredin sy'n cael ei ddefnyddio mewn achosion o 'date rape'. Paid meddwi gyda rhywun dwyt ti ddim yn ei nabod yn dda. Mae rhai pobol yn mynd yn gaeth (addicted) i alcohol. Os wyt ti'n yfed yn aml, bydd yr alcohol yn cael llai o effaith arnot ti, ac felly bydd angen i ti yfed mwy a mwy i feddwi.

Mae yfed llawer o alcohol dros gyfnod hir yn gallu gwneud niwed i'r galon a'r afu (liver), heb sôn am yr effaith mae'n ei chael ar dy ben.

Y gyfraith Mae alcohol yn gyffur cyfreithlon (legal), ond does dim hawl 'da pobol dan 18 oed i'w brynu.

Cysylltiadau defnyddiol

Gacu - cyngor a gwybodaeth am oryfed achlysurol cyflym mewn un noson

Frank - gwybodaeth diflewyn ar dafod am gyffuriau o bob math

Nid yw'r BBC yn gyfrifol am gynnwys gwefannau allanol.