Yr awydd i roi i Huw T Edwards y sylw yr oedd yn ei haeddu a sbardunodd Gwyn Jenkins i sgrifennu'r cofiant, Prif Weinidog Answyddogol Cymru.

"Yr oedd angen atgyfodi Huw T Edwards a rgoi iddo y sylw yr oedd yn ei haeddu," meddai wrth Dei Tomos ar BBC Radio Cymru.

Dywedodd i'w ddiddordeb yn yr undebwr llafur a gwleidydd ddeillio o'i ddiddordeb yn y berthynas rhwng Sosialaeth a chenedlaetholdeb.

"Ac yr oedd Huw T yn ffitio hynny wrth gwrs," meddai.

O blaid i blaid
Yn undebwr llafur bu'n aelod o'r Blaid Lafur gan symud at Blaid Cymru a dychwelyd wedyn i'r gorlan Lafur.

Ond yn ôl Gareth Jenkins ni fu bod yn aelod o'r ddwy blaid o les iddo gan nad oedd wedyn yn gymeradwy gan y naill blaid neu'r llall.

Disgrifiodd Huw T Edwards fel gŵr gyda chryn grebwyll gwleidyddol naturiol.

"Roedd ganddo dipyn o allu ond gallu dyn gweithiol oedd ganddo - doedd o ddim wedi cael addysg o unrhyw werth [a] greddf y dyn gweithiol galluog, dosbarth gweithiol, ffraeth, clyfar oedd e.

"Doedd e ddim yn feddyliwr dwys . . . ymateb oedd e i sefyllfaoedd ac yn aml mae pobl felly yn fwy effeithiol na phobl sy'n athronyddu," meddai.

Cyfeiriodd ato hefyd fel un oedd yn gallu trafod pobl o bob math yn dda gan gynnwys perchnogion ffatrïoedd a chyflogwyr.

"Yr oedd rhywbeth yn apelgar ynddo fel unigolyn," meddai.

Gwyn Jenkins yn siarad gyda Dei Tomos ar BBC Radio Cymru