|  |
 | |
 Lliwiau Lleisiau yn y Blaenau
"BBC - Blaenau Biau'r Cyfrwng," oedd geiriau Mici Plwm un o feibion enwocaf bro Ffestiniog wrth agor yn swyddogol ganolfan Lleisiau yn yr hen Go-op yn y dref.
Gyda phob math o weithgareddau ar y gweill yn barod mae cynllun Lleisiau wedi cael cychwyn go iawn ym Mlaenau Ffestiniog gydag agor yr hen Go-op yn y dref yn ganolfan ar gyfer y fenter nos Fawrth, Mai 20.
 Ac yno i ddweud "Mae'n 'gorad rwan" yr oedd un o feibion mwyaf adnabyddus yr ardal, Mici Plwm a gyfeiriodd at y môr o dalent sydd yna i'w feithrin yr ardal dan y cynllun newydd hwn gan BBC Cymru.
Mae Lleisiau yn golygu fod gan y BBC ac yn enwedig BBC Radio Cymru a'r gwasanaeth ar y We, BBC Cymru'r Byd, bresenoldeb yng nghanol y Blaenau am dri mis.
 Yn ystod y cyfnod hwn bydd darlledwyr a'r bobl leol yn cydweithio mewn mentrau darlledu a gweithgareddau yn y gymuned ac ar y we.
Bydd yn gyfle i feithrin talentau ac i gynnig hyfforddiant mewn defnyddio offer radio a darlledu gyda rhaglenni yn cael eu paratoi gan bobl yr ardal eu hunain.
Bydd hyn yn rhoi cyfle i bobl ifanc fo'r ardal fod yn DJs a chyflwyno eu rhaglenni eu hunain ar radio, er enghraifft.
 Dywedodd John Robers, cynhyrchydd gyda'r BBC sy'n cynnal y fenter, fod yna gamargraff ymhlith rhai mai lle llwyd a diliw ydi Blaenau Ffestiniog ond iddo ef gael ei argyhoeddi'n wahanol.
Gan gyfeirio at luniau lliwgar o'r Blaenau ar wal yr hen Go-op gan blant un o ysgolion y dref dywedodd:
"Yn amlwg dydi'r Blaenau ddim yn lle llwyd iddyn nhw ond yn fywiog ac yn lliwgar ac yn gyffrous a'r hyn fydd Lleisiau yn ceisio'i wneud fydd dal y bwrlwm lliwgar yna sydd yn cyffwrdd pob oed yn y Blaenau."
 Ychwanegodd mai ei obaith yw y bydd ysbryd Lleisiau yn parhau yn y fro wedi i'r cynllun ddod i ben.
"Ac yn parhau i hybu y diwylliant a'r iaith yn y fro a'r hyder sydd gan y plant yn eu bro fel sy'n cael ei ddangos yn eu lluniau," meddai.
Penllanw'r fenter, meddai Aled Glynne Davies, golygydd Radio Cymru, a oedd hefyd yn bresennol yn yr agoriad swyddogol, fydd pythefnos o ddarlledu lleol gyda chyflwynwyr a chyfranwyr lleol am awr a hanner bob nos a gwyl arbennig o ddoniau lleol yn ystod Mehefin a Gorffennaf.
 Bydd eitemau ar gyfer y rhwydwaith cenedlaethol hefyd ac mae cryn weithgarwch wedi dechrau'n barod ymhlith disgyblion ysgolion y fro gyda chiw yn Ysgol y Moelwyn yn sgrifennu eu drama radio eu hunain.
Law yn llaw a'r gweithgarwch radio bydd dalennau gwe hefyd ar y wefan hon gyda chyfle i bobl leol gyhoeddi lluniau ar y we a rhannu straeon difyr am yr ardal a'i phobl.
 "Bydd Lleisiau yn dod a'r holl weithgarwch a thalent lleol at ei gilydd fel y bydd pawb yn gallu clywed a gweld gymaint o ddoniau sydd ym Mlaenau Ffestiniog," meddai Aled Glynne Davies.
Ymhlith y rhai oedd yn croesawu'r fenter yr oedd Bryn Williams, cadeirydd Cyfle Ffestiniog, grwp a sefydlwyd yn arbennig i adnewyddu'r ardal.
| |
|  |
|
