Dewi James yn sgrifennu am ddiweithdra a'i effaith ar y Blaenau
Effaith diweithdra ar yr ardal -yn enwedig ar ieuenctid Mae diweithdra yn broblem fawr yma ym Mlaenau Ffestiniog. Mae'n gorfodi nifer fawr i symud o'r ardal i gael gwaith. Mae pobl ifanc sydd yn gorffen eu haddysg yn disgwyl cael gwaith gyda chyflog da ond gan nad oes digon o waith ar gael yma maent yn symud i ffwrdd i gael gwell cyflog a gwell bywyd.
Un enghraifft yw'r pwerdy niwclear oedd yn Nhrawsfynydd. Pan agorodd y pwerdy symudodd nifer fawr i mewn i'r ardal ond nawr mae'r atomfa wedi cau, ac felly symudodd y rhan fwyaf o'r gweithwyr i lawr i Gaint. Fel hyn mae teuluoedd yn chwalu a phobl yn colli cysylltiadau gyda'r ardal. Oherwydd bod pobl yn symud i ffwrdd maent yn colli'r arferiad o siarad Cymraeg.
Problem fawr ieuenctid y fro yw diflastod. Does dim i bobl ifanc wneud ar fin nos. Mae ieuenctid wedi dod i arfer mynd i helynt gyda'r gyfraith yma. Felly mae rhai yn trio creu hwyl a rhywbeth i'w wneud sef fandaleiddio. Siopau lleol sydd yn ei chael hi waethaf. Mae llawer iawn o bobl ifanc yn yfed ar y stryd a rhai yn mentro chwarae gyda chyffuriau. Mae rhai yn penederfyn dwyn ac er mai pethau mân maent yn eu dwyn ar hyn o bryd, gallent symud ynlaen i ddwyn pethau llawer mwy wrth fynd yn hyn.
Gwelwch felly mai fy safbwynt i yw y bydd ardal Ffestiniog o fewn can mlynedd yn diflannu'n ddim oni bai bod newid mawr yma. Nid oes dyfodol i bobl ifanc yn yr ardal. Felly rwyf yn gobeithio y cytunwch fod angen newidiadau yma neu chwalu a marw yn ddistaw fel y chwareli gynt fydd hanes yr ardal.
Dewi James
Un enghraifft yw'r pwerdy niwclear oedd yn Nhrawsfynydd. Pan agorodd y pwerdy symudodd nifer fawr i mewn i'r ardal ond nawr mae'r atomfa wedi cau, ac felly symudodd y rhan fwyaf o'r gweithwyr i lawr i Gaint. Fel hyn mae teuluoedd yn chwalu a phobl yn colli cysylltiadau gyda'r ardal. Oherwydd bod pobl yn symud i ffwrdd maent yn colli'r arferiad o siarad Cymraeg. 