"Roedd pysgota yn hobi am nifer o flynyddoedd tra roeddwn yn gweithio yn y ffatri gemegau yn Amlwch, cyn gorffen yno er mwyn pysgota'n llawn amser.

"Fe ddechreuon ni yn 1999, gan werthu cimychod a chrancod i dai bwyta. Yna, yn 2003 awgrymodd ffrind pam na fydden ni'n gwneud crancod parod?

"Wedi i ni ganfod sut oedd gwneud hynny fe ddechreuon ni o'r fan honno ac mae wedi tyfu a thyfu.

"Gallwn ganolbwyntio ar wneud cranc parod pan fo'r tywydd yn ddrwg a phan na allwn fynd ar y môr. Mae'n rhaid i chi ddod â llwyth o grancod i fewn, eu prosesu ac yna eu gwerthu.

"Rydym yn darparu ar gyfer tai bwyta, caffis, gwestai ac unigolion. Yn Ynys Môn yn unig rydyn ni'n dosbarthu, ond mae'n rhaid cofio bod nifer fawr o westai a thai bwyta ar yr ynys.

"Dwi'n mynd allan ar y cwch, a brynais yn 2002, pan fydd y tywydd yn iawn ac yn ystod yr haf dwi allan bob dydd.

"Mae'n amrywio faint rydw i'n ei ddal. Yn ystod yr haf, pan fo'r tymor yn ei anterth, gallwch fynd allan a dal 60 i 70 o gimychiaid a thua'r un nifer o grancod.

"Pan fo'r tymor yn ei anterth rydym yn prosesu tua 400 o grancod yr wythnos ac mae'n waith llafurus iawn.

"O'r eiliad rydyn ni'n dod nôl, mae'n rhaid eu coginio cyn gadael iddynt oeri dros nos a'u dosbarthu y diwrnod canlynol.

"Maen nhw wastad yn ffres, a dim ond os oes rhaid rydyn ni'n eu rhewi.

"Sefydlwyd y gegin y llynedd oherwydd ein bod angen digonedd o le ac mae'n llawer gwell gan fod popeth i law."