"Mae stiwardiaid fel rheol yn cynnig eu hamser am ddwy neu dair sesiwn yn ystod yr wythnos, sy'n golygu ein bod angen oddeutu 400 o bobl", eglura Gwyn Roberts, Cadeirydd Pwyllgor Stiwardio'r Eisteddfod yn Sir Conwy.

Ychwanegodd: "Rydyn ni'n hynod o ddiolchgar i'r gwirfoddolwyr sy'n cynnig eu cefnogaeth cyn ac yn ystod yr ŵyl, maen nhw'n gwneud gwaith gwych! Un o'r cyfrifoldebau fydd gen i yn ystod yr wythnos, fel Cadeirydd y Pwyllgor Stiwardio, yw sicrhau bod pob un gwagle yn cael ei lenwi gan stiwardiaid, a fydd yn hwyluso'r broses o reoli digwyddiad, cynnig cymorth a chyngor i gystadleuwyr ac ymwelwyr i'r maes."

Mae croeso i ddysgwyr neu i bobl ddi-Gymraeg gynnig eu hamser, gan y bydd siaradwr Cymraeg wrth law i gynnig cefnogaeth iddynt yn y gwaith. Bydd tîm yr Urdd yn cynnig hyfforddiant i bob stiward yn dilyn y Gwasanaeth Boreol ar faes yr Eisteddfod, ddydd Sul, 25 o Fai.

Yn ôl Irfon Bennett, is-gyfarwyddwr y Celfyddydau ac Eisteddfod Urdd Gobaith Cymru: "Mae llawer o'r gwirfoddolwyr yn barod iawn i stiwardio'r digwyddiadau poblogaidd, fel y cyngherddau nos, oherwydd gallant hwythau fwynhau'r arlwy wrth gynnig eu cefnogaeth i'r Eisteddfod. Tuag at ddiwedd yr wythnos, mae mwy o drafferthion, ac yn ddyddiol, mae pwysau arnom rhwng 10 y bore a 2 y prynhawn, gan fod y rhagbrofion yn dal yn eu hanterth a digwyddiadau'r pafiliwn hefyd yn cychwyn."

Dywedodd Irfon: "Byddwn i'n annog unrhyw un sydd ag amser, i gysylltu â ni. Rydych yn cael ymdeimlad da o'r cystadlaethau a'r digwyddiadau wrth stiwardio yn yr Urdd, a gobeithio yn mwynhau'r profiad, yn enwedig wrth brofi'r arlwy ar y maes ar ddiwedd eich sesiwn. Rydyn ni'n hynod ddibynnol ar wirfoddolwyr, ac mae ein diolch iddynt yn enfawr, gan eu bod yn sicrhau bod trefn a strwythur i ddigwyddiadau ar y llwyfan cenedlaethol hwn!"

Mae taflenni stiwardio ar gael o wefan yr Urdd www.urdd.org/eisteddfod, neu ar e-bost gwyn.roberts@conwy.gov.uk, neu irfon@urdd.org. Fel arall, cysylltwch ag Irfon Bennett dros y ffôn ar: 02920 635691.