Richard David: "Mae'r busnes yn mynd nol i Mehefin 30ain, 1934, pan agorwyd y siop gan fy nhad, Richard Gruffydd Prichard fel siop greengrocer, fel mae hi heddiw.

"Roedd tua 27 oed ar y pryd.

"Doedd rhedeg siop ddim yn y teulu cyn hynny ond mi roedd fy nhaid yn shipbroker ar y cei ac mi gafodd fedal gan y Dutch Council am ei wasanaeth pan aeth ar fwrdd un o'r llongau i helpu unwaith. Roedd ein hen hen daid yn Gapten Llong.

Bryn Geraint: "Roedd Capten Prichard yn hwylio i America - hwylio pobl ran fwyaf ac roedd sôn amdano'n mynd â llechi i Hamburg ac yn hwylio ar y Gestiana. Mi fyddan ni'n clywed ambell stori am y cyfnod: roedd llongau'n mynd â llechi i'r Iwerddon adeg y Diwygiad ac yn dod â rym yn ôl a dwi'n cofio clywed stori fod mochyn Y Ship wedi meddwi ar ôl i gasgen o rym gael ei gadael yng nghefn y dafarn.

Richard: "Dydi'r galw ddim wedi newid rhyw lawer yn y siop dros y blynyddoedd - pethau fel cabej, coli a sbrowts. Mae brocoli yn rhywbeth rydan ni'n ei werthu rŵan nad oedden ni'n arfer ei wneud, a phupur hefyd, a doedd neb yn gwybod am ffrwythau Kiwi ar un adeg! Dydan ni ddim yn gwerthu bwyd organig, dydi pobl ddim yn gofyn llawer am hynny a deud y gwir.

Bryn: "Ond mae lot o'r bwyd yn lleol - tatws o Roslan, swêj a betys o Chwilog, moron o Benygroes. Ers talwm, roedd y llysiau'n cyrraedd yn syth i'r stesion yn Port o Covent Garden a thryciau yn dod â'r bwyd o'r stesion i'r siop wedyn.

Bryn: "Fy hoff bryd o fwyd ydy cinio dydd Sul efo moron, spring cabbage a phys slwj.

Richard: "Cinio dydd Sul ydy fy hoff fwyd i hefyd. Dwi'n licio coli, cabej a brocoli ond fy ffefryn ydy sbrowts!"