"Rydw i'n ysgrifennydd Clwb Deillion Porthmadog. 'Da ni'n cyfarfod ar drydydd dydd Iau'r mis yn Noddfa Madog. Mae'r clwb ar gyfer pobl gyda thrafferthion gweld o gylch Penrhyndeudraeth, Port, Borth-y-gest a Morfa Bychan.

'Does dim rhaid i chi fod wedi'ch cofrestru'n ddall ac mae croeso i chi ddod â ffrind efo chi.

"Mae'n gymdeithas reit fywiog - rydyn ni'n cael pobl draw i siarad, rydyn ni'n canu, mynd ar dripiau, ac mae amser Nadolig yn amser pwysig iawn.

"Felly os oes unrhyw un ddim eto'n gwybod amdanom ni, mae'n bosib cysylltu efo ni ar 01766 513644.

"Mae Porthmadog yn lle digon diogel i bobl efo nam ar eu golwg i fyw, er bod angen newid dipyn ar y parc yma. 'Da ni mewn lle mor dlws, mi ddyle fod 'na well siâp arno ac mae'n debyg bod rhywbeth ar y gweill i'w wella. Mae gennym ni hefyd risiau mawr ar ben draw'r cei. Maen nhw'n hanesyddol wrth gwrs, ond maen nhw wirioneddol angen eu gwella gan eu bod yn beryg, yn enwedig i bobl efo trafferthion gweld."