Mae pob elw rydan ni'n ei wneud yn mynd at wella'r dref neu at elusennau lleol fel yr Ambiwlans Awyr, Tŷ Gobaith, Hosbis Dewi Sant, Plant Mewn Angen, MacMillan - rhywun sy'n gofyn i ni am help.

Gawson ni raffl car i hel arian i ddechrau, ac roeddwn wedi bod yn sefyll tu allan yn yr oerfel yn gwerthu tocynnau nes i fan hyn ddod yn wag ac mi wnes i benderfynu ei gymryd am ychydig er mwyn hel arian allan o'r gwynt. A dwi'n dal yma. 'Dwi ddim yn cymryd cyflog, ond mae ffrindiau yn dod i mewn i fy helpu.

'Dwi erioed wedi rhedeg caffi o'r blaen, ond mae pethau fel hyn yn dŵad i chi - wrth iddo dyfu yn araf bach dros y blynyddoedd.

'Da ni ar agor o ddydd Mawrth i ddydd Sadwrn, o 9.30am i 1.30pm, ond weithiau mae wedi tri o'r gloch cyn i mi adael.

Fe fuaswn i wedi hen gau, ond does unlle i bobl i fynd - does yna ddim caffi arall yma i ddweud y gwir, yn enwedig wrth i'r dref cael ei wneud i fyny. Efallai, pan mae popeth yn barod ar y stryd fawr y daw rhywun yma i agor caffi go iawn, ond ar hyn o bryd mi wnâ i barhau cyn hired ac y gallaf, er fy mod yn 70 erbyn hyn ac mae'n mynd yn lot o waith.

'Da ni'n cynnal boreau coffi, bingo, raffl - fedrwn ni ddim gwneud bob dim i bawb ond rydan ni'n gwneud cymaint ag y gallwn."

Pobl y caffi
Mae nifer yn galw draw i gaffi Light Up Pen am baned a sgwrs, gan gynnwys Leslie Ifans o Benmaenmawr, sy'n dweud hanes gwaith a diwydiant yn y pentref:

"Mi ges i fy ngeni yma, symud i Lanfairfechan oan oeddwn yn bump oed cyn dod yn ôl yma i weithio yn y chwarel. Roedd peth goblyn o bobl yn gweithio yno yr adeg honno - 'da chi'n sôn am dros fil o bobl yn 1956.

Chwarel granite (ithfaen) ydy o. Hwnna sy'n cael ei ddefnyddio i roi balast i'r rheilffordd neu waelod i'r lonydd. Byddwn yn ei flastio o'r mynydd, wedyn mynd a fo drwy'r crushers i'w dorri lawr i ryw hanner modfedd. Byddai loris neu drenau yn mynd â fo ledled Prydain.

Roedd 'na gymeriadau yn y chwarel: Wil Job, Bobby Fat a Twm Christmas!

Roeddwn i'n gyrru loris yn y chwarel, cyn mynd i Hotpoint i weithio draw yn Llandudno Junction. Roedd lot o Pen yn gweithio fa'na, yn gwneud washing machines i Ganada, Awstralia ac Affrica.

Mae colli cymaint o swyddi yn y chwarel - oherwydd dulliau newydd o weithio - wedi cael effaith ar y pentref. Mae llefydd wedi eu bordio a'r eglwysi wedi cau - mae'r oes wedi newid. Mae hyd yn oed y capeli a'r eglwysi wedi cau ond fe wnaethon ni gwffio i gadw Eglwys Dewi Sant, yr eglwys Gymraeg, ar agor. Cafodd ei hadeiladu dros gan mlynedd yn ôl gan y chwarelwyr, oedd yn rhoi ceiniog yr wythnos heibio ar ei chyfer - eglwys y bobol ydy hi."