Ewch i wefan y bartneriaeth am ragor o wybodaeth neu cadwch lygad allan am y cylchlythyr, Newyddion Moelfre, sy'n cael ei ddosbarthu yn yr ardal bob chwarter.

Derlwyn Hughes, cadeirydd y bartneriaeth, sy'n egluro beth sydd ar y gweill yn y pentref prysur am y misoedd nesaf:

"Mae amryw o bethau ar y gweill yn y pentref ar hyn o bryd:

1. Ymddangosodd cerdd gan y Prifardd Dic Jones i Dic Evans yn Golwg, ac fe sgwennais iddo yn gofyn iddo ei sgwennu yn ei lawysgrifen ei hun. Fe wnaeth hynny ac mae'r gerdd hefyd wedi ei theipio a'i fframio ac maent yn edrych yn wych. Mae yna un yn yr ysgol, un yn Anne's Pantry, ac un arall i'r Wylfan dros y Pasg.

2. Taith gerdded tywys yr haf yma yw Taith Archeolegol efo'r Archeolegydd lleol Neil Fairbairn sy'n aelod o Bartneriaeth Moelfre yn gyfrifol am lunio'r daflen.

3. Mae criw bychan yn mynd i leoli mainc a phlac wrth safle trychineb yr Hindlea yn ystod yr Haf.

4. Rydyn ni'n cydweithio i ystyried gosod plac i goffáu Joio Riggieri, llongwr ar long y Royal Charter fu foddi wrth geisio achub bywydau o'r drychineb honno, un o Malta oedd o a chyfeirir ato yn anghywir yn un o'r llyfrau coffáu fel 'Rodriguez'.

5. Bwriedir cynnal darlith goffa yn yr Hydref i'r diweddar Aled Eames - mae trafodaethau ymlaen ar hyn o bryd i drefnu'r achlysur.

6. Mae Gwilym Hawes, yr hanesydd lleol, yn gweithio ar ein hail llyfryn yn y gyfres yn dilyn cyhoeddi llyfryn yr Hindlea ac Eglwys Llanallgo a'i gysylltiad â'r Royal Charter a fydd allan yn Hydref 2005.

Tan tro nesa, felly!"
Derlwyn Hughes