Yn y dyddiau cynnar, cynhaliwyd yr eisteddfod yn yr Eglwys, ond wedi ffrae rywbryd yn y 1950au, trosglwyddwyd trefniadaur ŵyl i'r pentrefwyr, dan arweiniad y diweddar William Huws. Ef a wnaeth yr eisteddfod yn elusen, ac mae'r pwyllgor heddiw yn gweithio i barhau ei waith da o ddenu cystadleuwyr i'r ŵyl.

Ymhlith y rhai a fu'n cystadlu yn y Talwrn yn gantorion ifanc mae Gwyn Huws Jones, Huw Edward Jones a Leah Owen.

Drwy hysbysebu'r testunau yn yr Eisteddfod Genedlaethol, mae'r eisteddfod yma yn denu llawer o feirdd ac ysgrifenwyr o Gymru gyfan.

Ers 1999, cynhelir seremoni ar y cyd gyda'r nos (gweler yr oriel luniau) i gadeirio'r bardd buddugol ac i gyflwyno plât Celtaidd am y stori fer orau. Bydd cyfle hefyd i gystadleuwyr dan 21 oed ymgeisio am Dlws yr Ifanc.

Mae trefnwyr yr eisteddfod yma hefyd yn gweld pwysigrwydd cael hwyl, a bydd cystadlu ar gyfer y sgets orau gyda'r nos.

Darparwyd y wybodaeth hon gan y ddiweddar Meri Rhiannon Elis.