| Fel rhan o lansiad prosiect Creu Cyfle yng nghanolfan Galeri, roedd plant o Ysgol yr Hendre, Ysgol y Gelli, Ysgol Maesincla, Ysgol Santes Helen a Chanolfan Gymunedol Noddfa, Caernarfon, yn canu fel rhan o gôr Canolfan Gerdd William Matthias. Fe wnaethon nhw berfformio cyfieithiad o gân rhyddid y Baltig, 'Bydd Rydd, Fôr y Baltig', a ganwyd yn wreiddiol gan gadwyn o bobl yn Latfia, Lithwania ac Estonia yn 1989 i ddathlu democratiaeth. Un o bartneriaid eraill y prosiect ydy Dawns i Bawb, cymdeithas ar gyfer dawns yn y gymuned yng ngogledd orllewin Cymru. Ar gyfer y prosiect yma mae Grŵp Dawns Ieuenctid Gwynedd wedi bod yn gweithio gyda'r coreograffydd József Trefeli, sy'n enedigol o Hwngari, i greu'r Ddawns Ehangu. Mae'r ddawns wedi ei dylanwadu gan ddawnsio gwerin a cherddoriaeth draddodiadol Hwngari ynghyd â choreograffi gyfoes ac mae'r cwmni'n annog pobl i ddod i'w gweld yn ei pherfformio yn Eisteddfod Eryri am 10am ddydd Mawrth yn y Stiwdio Ddawns. Fel rhan o'r prosiect hefyd mae Cyngor Gwynedd wedi comisiynu artist i greu brithwaith yn Noc Fictoria a fydd wedi ei seilio ar argraffiadau pobl Caernarfon o Ewrop. Cafodd gweithagerddau'r prosiect eu cynnal ar faes Eisteddfod Eryri 2005 hefyd a bydd prosiectau diwylliannol yn cael eu cynnal mewn ysgolion lleol yn ystod y flwyddyn.
 | 
