 |  | | Blaenau Gwilym Euros
Gofynnwyd i'r Cynghorydd Gwilym Euros - restru ugain o Bethau'r Blaenau. Dyma'i restr. | | |
| Tanygrisiau: Y rhan orau o'r dref (a'r hardda ... yn ymestyn i fyny i Ddolrhedyn a Chwmorthin ... paradwys ar unrhyw adeg o'r flwyddyn!). Yma cefais fy magu ac o fan yma daw teulu Mam, teulu "Population" fel maen nhw'n cael eu hadnabod gan fod gan fy Nhaid, Wil "Population", 12 o blant!
Ysgol Tanygrisiau: Yno yr es i gael fy addysgu gan athrawon da a charedig. Mae fy nyled yn enfawr i Eifion O Williams, Nesta Evans a Ceryl Davies. Rwyf bellach yn Gadeirydd y Corff Llywodraethol ac i'r ysgol hon mae fy mhlant yn mynd ac mae'r addysg hyd heddiw yr un mor dda ag oedd pryd hynny.
Ysgol y Moelwyn: Er na wrandawais lawer tra roeddwn yno, dyma lle cefais fy addysg uwchradd a gwneud ffrindiau am oes.
Arwel Jones: Athro, Gweinidog, Cynghorydd, Pêl-droediwr, Golffiwr (nid un rhy dda, cofiwch), fy nghyn Brifathro ond mwyaf oll ffrind y byddai'n troi ato yn aml am ei farn a'i gyngor yn enwedig pan fyddai mewn trafferthion!!
Linda Ann Wyn Jones: Cynghorydd, Sylfaenydd Cwmni Seren a ffrind. Dynas llawn egni sydd wedi rhoi cyn gymaint i'r ardal. Mae'n un reit dda am wneud cyri hefyd!
Clwb Pêl-droed Amaturiaid y Blaenau: Clwb pêl-droed y dre. Tebyg iawn i Bryncoch United o'r rhaglen C'Mon Midffîld, yn cael ei redeg gan criw o gymeriadau hynod o ymroddgar a hwyliog. Hen bryd i'r dref dangos mwy o gefnogaeth i'r Clwb yn hytrach na rhedeg i Manceinion a llefydd tebyg i wylio prima-donnas!
Siop Chips Woolway's, Y Golden Mountain a'r Siop Kebabs: Mae'n amlwg fy mod yn licio fy mwyd a phan na fydd gan Catrin awydd coginio a finna'n methu, i un o'r llefydd yma byddwn yn troi am ein cynhaliaeth.
Y Moelwyn: Byddaf yn ei weld bob bore drwy ffenest y llofft. Byth yn edrych ru'n fath ond yn fy atgoffa pa mor lwcus ydw i i fyw mewn ardal mor hardd.
Cymeriadau sydd wedi llwyddo yn eu maes: Pobl o'r ardal sydd wedi llwyddo yn eu maes a rhoi'r Blaenau a'r Cylch ar y map am resymau da. Pobl fel Bruce Griffiths, Eigra Lewis Roberts, Gwyn Thomas, Geraint Vaughan Jones, Arwel Gruffudd (fy nghefnder), Gwyn Vaughan, Martin Hughes a Iwcs.
Miwsig: Fel un sydd wrth fy modd efo pob math o gerddoriaeth, dwi'n falch o ddeud fy mod yn dod o Stiniog. Edrychwch ar y cyfraniad sydd wedi dod ac yn dal i ddod o'r ardal i'r Sîn Roc Gymraeg - Anweledig, Estella, Mim Twm Llai a'r Anhygoel. Heb sôn am gyfraniad Band yr Oakley, Côr y Moelwyn a'r Côr Cymysg.
Llechi: Y rheswm am fodolaeth y dref! Wedi cynnal amryw o deuluoedd dros y blynyddoedd ac yn dal i wneud heddiw. Os gwireddir cynlluniau Cwmni Mc Alpine i drin y gwastraff, bydd yn dal i wneud hynny am ddegawdau i ddod.
Cymeriadau lliwgar a hwyliog: Maen nhw i'w cael ym mhob ardal, ond mae gan Blaenau fwy na'i siâr. Dwi ddim am eu henwi, mae gormod ohonynt ond os ydych yn dod o'r ardal dwi'n sicr eich bod yn eu hadnabod.
Siop Anti Esi: I'r fan yma roedd Mam yn mynd a fi i brynu sgidiau pan oeddwn yn hogyn bach. Roedd gan Anti Esi ffordd arbennig o drin plant ac roedd cael mynd yno yn bleser.
Dolrhedyn: Bûm yn byw yno rhwng 1976-1986. Lle da i fyw pan yn blentyn - yr afon i nofio yn yr haf, dam Dolrhedyn a Llyn Cŵn yn agos hefyd. Llawer o gymeriadau ffeind sydd bellach wedi marw yn rhoi sylfaen go lew i rywun adeiladu arno ar gyfer y dyfodol. Dyddiau da dros ben oedd dyddiau Dolrhedyn.
Cwmni Seren: Prosiect sy'n rhoi cyfle i unigolion gydag anableddau ddysgu gweithio o fewn i'w cymuned. Mae pobl Blaenau wedi croesawu'r prosiect sydd yn cyflogi'n agos i 50 o bobl ac mae'r unigolion sydd yn rhan ohono wedi cyfoethogi'r ardal mewn amryw o ffyrdd.
Pobl y Cylch: Er na fydd pawb yn cytuno a chydfyw yn hapus bob tro, mae hon yn ardal hynod i fyw ynddi. Pan ddaw gofid a galar i'ch rhan does unman yn debyg i 'Stiniog am glosio at y rhai sy'n llygaid y storm.
Teulu a Ffrindiau: Dwi'n ffodus dros ben i fod wedi priodi merch o'r Blaenau - Catrin. Mae swyddi y ddau ohonom wedi caniatâu inni aros yma i fyw a magu ein teulu. Mae Eurgain a Morgan yn mynd i ysgol Tanygrisiau ac mae rhieni Catrin a fi yn byw yn agos. Mae llawer iawn o'n ffrindiau yn byw yn y Cylch hefyd felly dwi'n teimlo yn freintiedig iawn, iawn!
Pan fyddai'n teithio adref o Gaerdydd, Llundain neu lle bynnag - mae fy ngwaith yn mynd â fi mi fyddai bob tro yn edrych ymlaen at weld Catrin a'r plant ac ar benwythnosau dwi wrth fy modd yn ymlacio gyda fy ffrindiau. Ydw, dwi'n sylweddoli fy mod yn lwcus iawn ac mae bywyd yn braf yn y Blaenau!
| | | |
 | | Mona Jones yn enedigol o Danygrisiau
Wedi gadael ardal fy ngeni ers chwedeg o flynyddoedd, ond mae fy nghalon yn eiddo i Stiniog am byth. Mae gennyf lawer o atgofion am fynd i ddysgu adrodd at Mr. Lewis Moelwyn Jones, a'r parti cyd adrodd lle'r oeddem yn llwyddianus yn eisteddfodau'r ardal. T.O.Williams yn brifathro gwych yn ysgol Tanygrisiau, a Miss Annie Davies-Jones yn athrawes, Miss Rainbow oeddem ni'r plant yn ei galw gan y byddai pob amser yn gwisgo "smock" pob lliw.
Cof arall sydd gennyf am y gaeaf caled yn 1947, a Llyn Croes wedi rhewi mor galed a'r plant i gyd yn cael hwyl fawr yn sglefrio arno, sglefrio hefyd i lawr allt Dolrhedyn, a chynhesu ein dwylo yn erbyn becws Trefor Williams. Yn yr haf byddem yn mynd am dro "rownd y Globe" siwrna reit hir. Ahefyd yn ystod yr Hydrefmynd i hel cnau , weithiau cyn belled a Rhyd sarn, roeddplant bryd hynny yn saff i fynd i grwydro heb ofn ogwbl. Amser y rhyfel daeth awyren i lawr ger Lyn Cwmorthin a chofiaf dod a darnau ohonni adref, German oedd hi. Rwy'n cofio hefyd i P C. Davies ddod yn blismon newydd i Danygrisiau, ac iddo gnocio drws ty ni ,sef Ysgoldy ,un noson i ddweud fod rhywfaint o olau yn dangos trwy'r blackout ar y ffenestr a buom yn ffrindiau mawr ag ef am flynyddoedd, plismon gwych. | | |
|
|
|
