Ti wedi cael dy wneud llysgennad myfyrwyr Cymraeg UMCB (Undeb Myfyrwyr Cymraeg Bangor). Oeddet ti'n gwybod hynny?

Ww, posh! Mae'n meddwl lot i mi, diolch yn fawr. Mae'n swnio'n cŵl - awsome!

Wyt ti'n difaru peidio â mynd i Brifysgol Bangor yn 2006?
Na, achos dwi'n byw fy mreuddwyd rŵan a dwi am fynd flwyddyn nesaf felly dwi am wneud popeth dwi'n gallu rŵan - byw'r freuddwyd, fel maen nhw'n ddweud.

Wyt ti'n dal eisiau dysgu Cymraeg ar ôl coleg?
Oes, dyna yw fy mhrif fwriad pan dwi'n hŷn - i ddysgu Cymraeg i bobl, dwi'n meddwl ei bod yn bwysig gwneud.

Sut deimlad ydy bod yn 'seleb' yn dy ardal dy hun?
Dwi'm yn gwybod! 'Swn i ddim yn galw fy hun yn 'seleb' ond mae'n wych cael pobl yn dod atat ti a deud petha neis a rhoi pethau i ti a dwi jest yn joio fy hun - mae'n wych.

Ydy'r tŷ wedi dy newid o gwbwl?
Do, dwi wedi tyfu i fyny yna, mae gen i fwy o confidence a dwi'n fwy indipendant. Dwi gorfod gwneud lot o bethau ar ben fy hun rŵan - mynd i'r airport, trafaelio rownd y wlad, pethau 'swn i byth wedi eu gwneud ar ben fy hun o'r blaen. Dwi'n gorfod gwneud pob peth rŵan - nôl bwyd ac yn y blaen. Dwi jest yn byw fy mywyd ar ben fy hun - mynd o dre i dre, o stiwdio i stiwdio, o westy i westy.

Wyt ti dal yn byw gartref efo dy fam a dy dad?
Dwi 'mond wedi bod adra am dri diwrnod ers gadael y tŷ! Bob tro dwi adra mae mam yn gofyn os dwi'sho mynd allan am fwyd, ond dwi jest eisio mynd i'r gwely gan fy mod i mor shattered! Ond dwi'n gwneud gymaint â dwi'n gallu rŵan.

Wyt ti wedi cael unrhyw gynigion teledu/radio?
Do, dwi am wneud Planed Plant am wythnos ac wedyn dwi am wneud C2 am wythnos hefyd - dwi'n edrych ymlaen at hynny, methu 'gwitsiad' a dwi'n gobeithio mynd ymlaen o hynny.

Bydd Glyn yn cyd-gyflwyno gyda Daf Du am wythnos rhwng Tachwedd y 6ed a'r 10fed ar BBC Radio Cymru. Bydd yn dewis peth o'i hoff gerddoriaeth; trafod ei brofiadau o gael ei gloi yn y tŷ a'i brofiadau ar ôl gadael y tŷ. Mi fydd hefyd yn ateb rhai o'ch cwestiynau chi, felly os oes ganddoch gwestiwn i'w ofyn i Glyn, ebostiwch c2@bbc.co.uk.