"Roedd y rhan fwyaf o'r plant yn dod o Loegr cyn i mi ddod yma, ond roeddent eisiau rhywun Cymraeg i gynnig cyrsiau i ysgolion lleol. Dwi wedi cael fy magu yng ngogledd Cymru, heb gael y cyfle i fynd i lefydd fel hyn.

Doedden ni ddim yn mynd efo'r ysgol, ac felly byddwn i a fy ffrindiau fyth yn meddwl mynd i gerdded yn Eryri, gan ein bod yn meddwl bod yn rhaid cael arbenigedd mewn mynydda i wneud hynny. Doedden ni ddim yn gyfarwydd â'r wlad o'n cwmpas ac roedd 'na hefyd ddiffyg hyder, er ein bod wedi byw yma erioed.

"Dwi'n sôn am gynaladwyedd - sut i fod yn fwy gwyrdd trwy ail-gylchu, defnyddio llai o ynni ac yn y blaen. Y pethau hawsaf i'w wneud yw cychwyn defnyddio llai a defnyddio rhywbeth mewn ffordd wahanol. Insiwleiddio'r tŷ fel nad yw'r cynhesrwydd yn dianc trwy'r to a'r waliau, a diffodd offer fel teledu a DVD yn lle eu gadael ar standby a defnyddio lot fawr o ynni.

"Dwi'n dangos i'r plant beth a sut i ail-gylchu. Dwi'n dangos y symbol ar wastraff plastig sy'n dweud ein bod yn gallu ei ail-gylchu, a'r rhif o fewn y symbol sy'n dweud pa fath o blastig ydy o. Mae llawer o bobl gwledydd Ewrop yn deall hyn ond mae gan Brydain ffordd bell i fynd.

"Dwi hefyd yn sôn am fioamrywiaeth - trïo annog y plant i gymryd sylw o'r amgylchedd o'u cwmpas - cymharu gwahanol gynefinoedd - pa anifeiliaid sydd yno, pa fath o goed sy'n tyfu, beth sydd yna i'w glywed a'i arogli. Mae pawb yn rhuthro o gwmpas gymaint ac mae plant eisiau popeth mor sydyn. Fa'ma, gobeithio, maen nhw'n dysgu i ddefnyddio eu dychymyg.

"Maen nhw hefyd yn gallu datblygu sgiliau newydd, fel y plant sydd ddim mor dda yn gwneud gwaith ysgrifenedig ond, drwy beidio gorfod gwneud hynny, yn darganfod bod ganddynt wybodaeth gyffredinol dda iawn.

"Cafodd Rhyd-y-creuau ei agor 40 o flynyddoedd yn ôl. Roedd yn rhan o stâd y Foelas. Mae'r tŷ reit grand. Mae fferm Rhyd-y-creuau drws nesa a choed Rhyd-y-creuau dros y ffordd - dim i wneud efo ni, ond dwi'n siŵr eu bod i gyd yn rhan o'r stâd.

"Cafodd wedyn ei wneud yn ysgol breswyl i fechgyn bonedd, yna ei chau i lawr ac aeth yn adfail. Cafodd ei phrynu gan y Field Studies Council, gyda help gan Drapers, cwmni yn Llundain sy'n edrych ar ôl arian ymddiriedolaethau ar gyfer gwella addysg plant.

"Mae'r adeilad yn dal fel oedd o y tu mewn ac yn gallu codi ofn ar bobl! Mae ar bobl ofn bod yna ar eu pen eu hunain, yn enwedig gyda'r nos gan ei bod yn dywyll, dywyll yna - dim golau tu allan, sŵn tylluanod a synau'r hen dŷ!"