Môr Mam Cymru yw enw pasiant newydd a gynhelir ym mro Amlwch fis Ebrill 2008.

Fe geir ynddo hanes a dylanwad y môr ar fywyd a diwylliant y gymuned yng ngogledd Môn.

Fe ddechreuodd y cyfan efo'r frawddeg: "Dwi 'sho gneud rhywbeth yn Amlwch ar thema'r môr". Geiriau Iwan Llewelyn-Jones (uchod), y pianydd proffesiynol sy'n perfformio ar hyd a lled y byd, ond â'i wreiddiau yn ddwfn yn Amlwch.

Yna fe ddaeth y syniad i lwyfannu pasiant fyddai'n cynnwys talentau bro gyfan, yn blant, pobl ifanc, athrawon, a rhieni, yn ddawnswyr a chorau, a phwy'n well i gyfarwyddo'r gwaith na Iwan, sydd a phrofiad eang o gydweithio gyda athrawon cerdd ysgolion cynradd ledled Cymru.

Mae'r gwaith hwnnw eisoes wedi cychwyn efo cyfres o weithdai cerddorol a llenyddol yng nghwmni Iwan Llewelyn-Jones a'r awdures Bethan Gwanas i gynrychiolaeth o athrawon o Ysgolion Cynradd Amlwch, Penysarn, Rhosybol, Carreglefn, Cemaes, Llanfechell, Moelfre a Benllech.

Fe fydd pob ysgol yn mynd ati i ysgrifennu darn o ryddiaith/barddoniaeth disgrifiadol a ddefnyddir fel sylfaen i greu cyfansoddiadau gwreiddiol offerynnol. Canolbwyntir ar ddefnydd o offerynnau i greu seiniau o bob math.

Bydd y pasiant yn cynnwys 130 o blant y cylch, ac yn ymuno efo nhw fe fydd Côr Trysglwyn o Amlwch, côr a sefydlwyd yn 2007 o dan arweiniad Sara Huws ac Olwen Hughes, a hefyd Grŵp Dawnsio Amlwch sydd yn enwog trwy Gymru a thu hwnt am ennill gwobrau dawnsio disgo o dan gyfarwyddyd Diana Hughes.

Mae rhai o ddisgyblion celf Ysgol Syr Thomas Jones ynghyd â rhai oedolion o'r ardal gyda chymorth Islwyn Williams yn brysur wrthi'n paratoi cefndir gweledol i'r pasiant, ac fe fydd cwmni 'Mad' yn gofalu am y sain a'r goleuo.

Cynhelir y ddau berfformiad yn Neuadd Goffa Amlwch ar nos Wener a nos Sadwrn 18-19 Ebrill 2008 am 7.30yh.

Ariannwyd y prosiect gan Brosiect Ysgolion Bro, Awdurdod Addysg Lleol, Gyrfa Cymru, Bwrdd yr Iaith Gymraeg, Asiantaeth Gelf Gwynedd a Môn, a Chyngor Addysgu Cyffredinol Cymru.