'Tonnau' oedd y testun ac fe sgwennodd Llŷr awdl yn cymharu taith bywyd i fordaith - weithiau'n hwylio'n braf, dro arall yn gorfod dygymod â stormydd enbyd.

Roedd 19 wedi cystadlu a hynny am gadair go arbennig. Roedd wedi cael ei chyflwyno i'r Eisteddfod gan deulu y diweddar Dic Jones a'i chynllunio gan Glan Rees, ffrind agos i'r cyn-archdderwydd.

"Roedd ennill y gadair arbennig yma yn anrhydedd o'r mwya," meddai Llŷr, sy'n 23 oed ac yn gwneud MA yng Ngholeg yr Iesu, Rhydychen ar ôl graddio y llynedd yng Nghaerdydd.

"0 gofio bod Dic Jones wedi ennill cadair yr Urdd bum gwaith yn olynol ddiwedd y 50au, a bod ei deulu ac un o'i ffrindiau yn gyfrifol amdani eleni, roedd cael cipio cadair Ceredigion yn gryn fraint."

Mae Llŷr, cyn ddisgybl yn Ysgol y Gelli a Syr Hugh, wedi ennill cadair y Steddfod Ryng-golegol ddwywaith yn y gorffennol.

Bu hefyd yn actio rhan Chris yn 'Rownd a Rownd' am ddwy gyfres.

Fe geisiodd am gadair yr Urdd y llynedd hefyd ond bryd hynny doedd o ddim yn y dosbarth cyntaf.

"Mae'n werth cystadlu er mwyn cael beirniadaeth," meddai Llŷr, "a chymryd sylw o'r hyn mae'r beirniaid yn ei ddweud."

Mae'n amlwg iddo gymryd mwy na sylw o'r sylwadau a gafodd y llynedd llongyfarchiadau mawr iddo. Papur Dre