Mae Mickey Thomas yn un o griw o bêl-droedwyr talentog a ddaeth o'r gogledd orllewin yn ystod yr wythdegau.

Yn ifanc iawn, roedd ei frwdfrydedd yn amlwg dros y gêm ond yn anffodus doedd ganddo ddim esgidiau pêl-droed. Fe glywodd ffatri leol Quinton Hazell am hyn a phrynu rhai iddo a doedd dim stop arno wedyn!

Yn 13 mlwydd oed fe brofodd Mickey lwyddiant efo tîm y ffatri yng Nghyngrair Conwy ar yr asgell chwith. Ond yn 15 oed mi gafodd o a'i ffrind Joey Jones eu gwahodd i ymuno â thîm pêl-droed Wrecsam. Er iddo dreulio'r ddwy flynedd gyntaf yn glanhau sgidiau, stafelloedd newid a'r stadiwm, fe gafodd ei ddewis yn 17 oed i chwarae dros y tîm cyntaf. Dan arweiniad y rheolwr ar y pryd, John Neal, fe fu'r tîm yn llwyddiannus iawn yn ystod y cyfnod gan gyrraedd rownd yr wyth olaf yng nghwpan FA Lloegr yn 1974, Cwpan Enillwyr Ewrop yn 1976 gan golli i'r pencampwyr, Anderlecht.

Ond ar ôl helpu Wrecsam i gyrraedd Pencampwriaeth y Drydedd Adran mentrodd Mickey i chwarae dros y ffin ac ymunodd â Manchester United. Yno fe chwaraeodd 110 o gemau gan sgorio 15 gôl i'r cochion cyn symud i Everton ac yna i Brighton, Stoke a Chelsea. Yn Chelsea, bu'n chwarae i'r tîm a enillodd yr Ail Adran yn Lloegr gyda'i hen gyfaill Joey Jones, cyn symud yn ôl i Wrecsam yn 1991.

Ac fe ddathlodd! Pan gurodd Wrecsam Arsenal yng nghwpan yr FA yn Ionawr 1992, Mickey, ac yntau'n 37 oed, a sgoriodd y gôl enillodd y gêm.

Enillodd Mickey Thomas 51 cap dros Gymru hefyd gan sgorio gôl bwysig ym muddugoliaeth 4-1 Cymru dros Loegr - un o gemau bwysicaf ei yrfa yn ôl Mickey. Er nad ydy o'n chwarae'r gêm bellach, mae'n sylwebu'n gyson ar gemau Manchester United a Chymru.