Aneurin: Fe fuaswn i ac Ed yn ennill mewn rap off yn erbyn y GLC - 'da ni'n gallu free steilio mewn pedwar iaith!
Dyma Aneurin i brofi ei honiad ...

Pwy yn union sydd yn y Genod Droog?
Gethin: Mae'n gymysgedd o aelodau o grwpiau eraill - fi, Aneurin o'r Diwygiad a Dyl ag Ed o Pep le Pew.

Mae'n gyfle i wneud rhywbeth gwahanol yn gerddorol.

Aneurin: A chyfle i gael cynnwrf set fyw gyda phobl newydd.

Ddaru ni berfformio am y tro gyntaf efo'n gilydd yn y Railway Club ym Mangor yn Nhachwedd 2005. Roedd 'na concerted effort wedyn i gael Geth ac eraill i drefnu Taith Tew dros Gymru i gyd, gan gychwyn yn y gogledd. Ers hynny rydym wedi bod yn chwarae gwyliau a gigiau man hyn a fan draw.

Sut mae'r Genod Droog yn mynd ati i greu caneuon?
Gethin: Mae 'na lot fwy o'r ochr stiwdio efo Genod Droog - mae'r broses yn hollol wahanol i be dwi wedi arfer ag o. Efo Kentucky AFC mae'r tri ohonom yn dod at ein gilydd, mi fydd Endaf a Huw wedi dod â syniad am gân, a mi rydyn ni'n ei greu fel 'na. Ond efo'r Genod Droog, 'da ni'n chwilio am samplau i gychwyn cân - pawb yn eistedd o flaen cyfrifiadur yn defnyddio eu dawn gerddorol i adeiladu ar hynny.

Aneurin:: Mae ei gael ar gyfrifiadur fel 'na fel blank canvas, cyfle i bawb ddod â'i gefndir, syniadau a dylanwadau gwahanol i mewn i'r peth.

Gethin: Mi wnawn ni recordio'r gân yn ei chyfanrwydd, wedyn er mwyn gallu ei chwarae yn fyw, mi fyddwn ni'n dynnu'r dryms, y gitâr, y bâs a'r llais allan a roi beth sydd ar ôl ar sampler a chwarae efo'r sampler ar y llwyfan.

O ble daeth yr enw?
Gethin: Dyl ac Ed (o Pep Le Pew) feddyliodd am yr enw. Maen nhw'n obsessed efo Jim Fenner, cymeriad o'r rhaglen Bad Girls. Felly mae'n bosib mai cyfieithiad o Bad Girls yw Genod Droog, er nad ydan ni'n cyfaddef hynny fel arfer!

Aneurin: Ond mae rhai yn y de yn ein galw ni'n Merched Droog neu Genod Brwnt! Y syniad gwreiddiol oedd Genod Paranoid neu Gwm Tatws!

Sut brofiad yw bod mewn gŵyl fel y Sesiwn Fawr gyda band arall?
Gethin: Mae'n braf bod yma efo band arall, mae'n gyfle gwych i ni. Mae chwarae mewn llefydd bach dros Gymru yn gallu bod yn dorcalonnus weithiau, gyda'r sain ddim mor dda a ballu. Ond yma, efo system mor dda, mae'n bosib canolbwyntio ar y perfformio yn lle poeni am bopeth arall.

Beth all y gynulleidfa ei ddisgwyl mewn gig Genod Droog?
Gethin:: 'Da ni'n gwneud un gân sy'n freestyle - 'da ni'n gofyn i'r gynulleidfa am dri gair a 'da ni - wel, dim fi, dwi'n chwarae'r dryms! - ond mae Ed ac Aneurin yn gorfod rhoi'r geiriau yna yn y gân. Mae o'n gweithio'n dda.

Aneurin: Mae cofio geiriau wrth rapio yn gallu bod yn anodd - mae'n rhaid iddyn nhw ddod yn lot cyflymach 'na phan mae rhywun yn canu. Mae'n rhaid i chi gofio'r patrymau a'r rhythmau odli a'u rhoi at ei gilydd fel jig-so.

Gethin: Dwi'n recno fod gan Aneurin tua ugain o core odlau rap!

Aneurin: Wel, os ti'n ei wneud yn aml ti'n gwybod beth sy'n mynd efo'i gilydd.

Beth yw'r dyfodol i'r Genod Droog?
Aneurin: Lle mae Genod Droog am fynd - Mawrth neu Jiwpiter? Wel, 'da ni am fynd i weithio i stiwdio mewn coedwig yn Ffrainc.

Gethin: Ia, fel rehab! Fel stiwdio Rockfield ond yn boethach ac ymhellach o gartref.

'Da ni erioed wedi bod efo'n gilydd am gyfnod mor hir o amser felly dwi'n siŵr y byddwn ni'n ffraeo dros Bot Noodle neu rywbeth erbyn y diwedd!