Bwriad y teithiau tywys fydd rhoi cyfle i ddefnyddwyr cadeiriau olwyn fwynhau cynefinoedd gwledig a gwarchodfeydd natur heb drafferthion.

Bydd swyddogion a gwirfoddolwyr ar gael ar y dydd i gynnig cymorth, ond gofynir i ddefnyddwyr cadeiriau olwyn ddod ag o leiaf un ffrind neu berthynas gyda hwy. Am fod nifer y llefydd wedi eu cyfyngu, cynghorir y sawl sydd a diddordeb i gysylltu ar fyrder.

Cynigir y teithiau canlynol yn ystod y misoedd sy'n dilyn.

Mehefin 12, 2004
Coed Nyrs, Tremadog a'r Cob
Taith o amgylch coedlan William Madog gyda thro ar hyd y Cob sy'n edrych dros olygfeydd godidog o Afon Glaslyn ac Eryri tu draw.

3 Gorffennaf 2004
Gwarchodfa Natur Genedlaethol Dyffryn Aber
Taith drwy'r dyffryn hyfryd a gwyllt ger Abergwyngregyn. Ymweliad â'r Rhaeadr Fawr, gyda sgwrsio, straeon a hanes yr ardal.

Awst 14, 2004
Gwarchodfa Morfa Madryn
Taith ar hyd yr arfordir o Lanfairfechan i ymweld â'r warchodfa natur a'i chyfoeth o adar lleol.

Medi 11, 2004
Parc Glynllifon
Taith tywysedig o gwmpas y parc, gyda hanes yr hen stad a'r bywyd gwyllt

Mae Haydn Hughes, sy'n trefnu'r cynllun ar ran Cyngor Gwynedd yn apelio am wirfoddolwyr fyddai'n barod i fod o gymorth yn ystod y teithiau.

"Mae hyn yn gyfle gwych i ddefnyddwyr cadeiriau olwyn i ymweld â lleoliadau sydd ddim mor hawdd ymweld â hwy heb gymorth gwirfoddolwyr," meddai.

"Rwy'n gobeithio yn fawr y bydd unigolion sy'n mwynhau bywyd gwyllt a natur yn cynnig dod i helpu er mwyn gwneud y teithiau yn werth chweil i bawb sydd am ymuno â ni ar y dydd," ychwanegodd.

Am fwy o fanylion neu os hoffech ymuno â'r teithiau cysylltwch â Haydn Hughes ar 01286 831877.

Cyngor Gwynedd