Bydd y cyfarwyddwr ffilm yn mynychu cynhadledd gyntaf Cyfrwng ym Mhrifysgol Cymru, Bangor, 16-18 Ebrill, am dridiau cyffrous o drin a thrafod a dathlu'r cyfryngau yng Nghymru yng nghwmni nifer o arbenigwyr rhyngwladol."Y mae Ken Russell yn ffigwr adnabyddus a hynod liwgar o fyd y cyfryngau, ac fe gaiff y clod am lunio rhai o ffilmiau a chynyrchiadau teledu gorau'r ugeinfed ganrif," esboniodd Dr Gwenno Ffrancon, darlithydd ffilm yn Adran Cyfathrebu a'r Cyfryngau y Brifysgol.
"Nodweddir ei weithiau gan wreiddioldeb trawiadol, symboliaeth ergydiol, ymdriniaethau dadleuol a pherfformiadau theatraidd hynod ddramatig. Ymhlith ei ffilmiau enwocaf ceir The Devils, Women in Love, Mahler, Savage Messiah, Altered States a Crimes of Passion, ac ymhlith ei weithiau adnabyddus ar gyfer y teledu y mae Elgar, Song of Summer a Lady Chatterley. Dyma gyfarwyddwr sydd wrth ei fodd yn synnu a gwefreiddio ei gynulleidfa â'i ddelweddau eithafol a chythryblus", ychwanegodd.
Derbyniodd Russell ei swydd gyntaf ym myd y cyfryngau fel gwneuthurwr ffilmiau ar y gyfres gelf Monitor dan arweiniad y Cymro, Huw Wheldon. Enillodd ei ffilm nodwedd ar y cyfansoddwr Elgar (1962) boblogrwydd aruthrol, ac ym marn llawer, bu'n gyfrifol am ailgynnau'r diddordeb yng ngerddoriaeth y cyfansoddwr.
Ym 1969 cyfarwyddodd Russell, ar gyfer y sgrin fawr y tro hwn, y ffilm Women in Love. Dyma ei lwyddiant cyntaf ar raddfa fawr, a mynych y cyfeirir at y ffilm fel carreg filltir hanes sinema Prydain. Y mae Russell wedi cyfarwyddo gweithiau mor amrywiol â ffilmiau cerdd bywgraffiadol (The Music Lovers, er enghraifft), ffilmiau cerddoriaeth roc (Tommy), addasiadau o weithiau llenyddol (Lady Chatterley) a ffilmiau arswyd-hanesyddol (The Devils).
Ymhlith yr actorion adnabyddus sydd wedi ymddangos yn ffilmiau'r cyfarwyddwr unigolyddol hwn y mae Oliver Reed, Alan Bates, Glenda Jackson, Robert Powell, Amanda Donohue, Hugh Grant a Kathleen Turner.
"Rydym yn falch iawn ein bod wedi llwyddo i ddenu ffigwr mor uchel ei broffil a diddorol i gynhadledd gyntaf Cyfrwng, ac rydym yn edrych ymlaen i groesawu Ken Russell i Fangor, meddai John Hefin, Cadeirydd Cyfrwng.
Mewn digwyddiad sy'n agored i'r cyhoedd am 4:30pm ddydd Gwener 16 Ebrill, ym Mhrif Ddarlithfa'r Celfyddydau yn y Brifysgol, bydd Cyfrwng, mewn cydweithrediad â Phrifysgol Cymru Bangor, yn cynnig cyfle prin i glywed Ken Russell yn trafod ei waith a'i yrfa hyd yn hyn, a chawn glywed ganddo hanes ei gynlluniau ar gyfer y dyfodol.
Prifysgol Cymru, Bangor
