Syniad y Mentrau Iaith lleol yw'r cynllun ac maen nhw wedi canfod mannau aros yn yr ardal sy'n darparu ar gyfer dysgwyr y Gymraeg gan roi cyfle iddynt ymarfer eu hiaith newydd.

"Mae denu rhagor o ddysgwyr i ddod am wyliau i gadarnleoedd yr iaith yn ffordd wych o hyrwyddo'r Gymraeg," meddai Carys Dafydd o Fenter Iaith Gwynedd.

"Mae o'n rhoi cyfle i ddysgwyr ymarfer a gwella eu hiaith ac mae'n ffordd o hybu'r economi lleol ar yr un pryd," ychwanegodd.

Mae llyfryn eisoes wedi'i gynhyrchu sy'n cynnwys llety, bwytai ac atyniadau twristaidd yn yr ardal lle mae'r Gymraeg yn cael ei siarad. Mae'r wybodaeth ar gael hefyd ar wefan newydd: www.gwyliaucymraeg.com neu www.holidaysinwelsh.com.

"Mae'r cyfuniad o harddwch naturiol eithriadol ac ardaloedd lle mae dros 70% o'r boblogaeth yn siarad Cymraeg yn golygu bod gogledd orllewin Cymru yn ddelfrydol ar gyfer menter or fath," meddai Dafydd Roberts o Amgueddfa Lechi Llanberis fu'n rhan o lansio'r fenter newydd yn swyddogol dros y Sul.

"Y diwydiant llechi oedd y diwydiant mwyaf Cymraeg yng Nghymru felly mae'n addas ein bod ni yn yr amgueddfa'n gwneud defnydd llawn o'r iaith Gymraeg wrth ddehongli'r diwydiant hwnnw," ychwanegodd.

Y cam nesaf fydd cydweithio gyda darparwyr allweddol yn y diwydiant ymwelwyr yn yr ardal gan gynnig canllawiau ar sut i ymateb i anghenion ieithyddol dysgwyr.

"Mae mor bwysig ein bod ni i gyd â'r amynedd a'r dyfalbarhad i gynnig pob anogaeth i ddysgwyr," ychwanegodd Carys Dafydd.

"Mae mor hawdd troi yn ôl i siarad Saesneg, ond mae'n rhaid rhoi pob cyfle i ddysgwyr ymarfer yr hyn iddyn nhw ei ddysgu yn y gwersi," meddai.

"Un o'r pethau sy'n llesteirio dysgwyr wrth ddysgu'r iaith yw'r diffyg cyfle i'w defnyddio.

"Rydan ni eisiau rhoi cyfle i ddysgwyr gael mwynhau harddwch yr ardal, cael blas ar ddefnyddio'r Gymraeg, bod yn rhan o'r diwylliant mewn tafarn hwyliog - a phrofi croeso Cymraeg ar ei orau," meddai Carys.

"Drwyddo draw mae'r cynllun yma'n gyfle heb ei ail i hyrwyddo traddodiad diwylliannol cyfoethog a harddwch naturiol Gwynedd a Chonwy - ac yn enghraifft o dwristiaeth gynaliadwy ar ei orau," ychwanegodd.

I ddathlu'r lansio cynhaliwyd raffl am ddim gyda'r brif wobr o noson i ddau yng ngwesty moethus Portmeirion yn cael ei ddyfarnu i Einir Pritchard o Faentwrog.

Gellir cael gopi o'r daflen trwy gysylltu â Carys Dafydd, Menter Iaith Gwynedd, 38 Stryd Fawr, Caernarfon, Gwynedd LL55 1RH ffôn 01286 674112 neu e-bost gwyliaucymraeg@cymad.org

Utgorn