| Ewch drwy'r lluniau isod i weld rhai o enillwyr a chystadleuwyr 2004 a darllenwch ymlaen i wybod sut gallwch chi gystadlu. Mae cystadleuaeth Gardd Bywyd Gwyllt Gorau Eryri yn agored i bobl Gwynedd a Chonwy mewn pedwar categori: gerddi preifat, ysgolion, busnesau a grwpiau cymunedol a'i bwriad ydy annog pobl i greu gardd ddeniadol a chroesawgar ar gyfer bywyd gwyllt, yn ogystal â phobl. Meddai Anna Williams, y Swyddog Prosiect, am gystadleuaeth 2004: "Roedd y broses ddyfarnu'n ddiddorol, a chawsom y cyfle i weld mannau cyfareddol a oedd wedi'u newid yn hafan ar gyfer bywyd gwyllt.  "Roedd dewis enillwyr yn dipyn o dasg, ond teimlaf fod y prif nod yn llawer iawn pwysicach, sef ysgogi pobl i feddwl am y ffordd yr ydym yn garddio. Rydym yn annog compostio a defnyddio pethau amgen yn lle chwynladdwyr a phlaladdwyr, rydym yn edrych am dystiolaeth o greu cynefinoedd yn ogystal â phresenoldeb amrywiaeth o blanhigion.
"Roedd pawb eisiau creu lloches a darparu bwyd ar gyfer adar, gwenyn, glöynnod byw, creaduriaid bychan a mamaliaid, ac roedd rhai hyd yn oed wedi gwneud ymdrech i adeiladu pwll dŵr. "Calonogol oedd gweld plant yn cymryd rhan, a'r ysgolion yn cymryd mwy o ddiddordeb mewn creu gerddi sy'n gyfeillgar ar gyfer bywyd gwyllt. Fel y dywedodd Gillian Evans, Prifathrawes Ysgol Pen-y-Bryn, Tywyn: 'Nawr bod gennym bwll dŵr, dolydd, gwrychoedd a gwelyau blodau/llysiau, nid oes rhaid i ni fynd mewn cerbyd a gyrru i fannau fel bod y plant yn gallu gweld bywyd gwyllt! Mae ar y stepen drws ac rydym yn arbed tanwydd ac yn gostwng llygredd.'" Yn ôl Anna, mae'r beirniaid yn chwilio am:
Amrywiaeth o nodweddion yn yr ardd sy'n cynnal bywyd gwyllt - blychau nythu, byrddau adar, gwrychoedd, pyllau, twmpathau o goed ayb.
Amrywiaeth o blanhigion sy'n rhoi bwyd a lloches i fywyd gwyllt drwy gydol y flwyddyn.
Ddefnydd o adnoddau naturiol mewn modd sensitif - e.e. gwneud compost a defnyddio cynnyrch heb fawn, casglu dŵr glaw a'i ddefnyddio, peidio â defnyddio plaladdwyr, ayb.
Manylion eich cofnodion garddio am y flwyddyn.
 | 
