Eisteddfod capel oedd Eisteddfod Mynytho yn wreiddiol, ac ar ôl cyfnod o seibiant, cafodd ei hatgyfodi yn 1962 dan law pwyllgor yr aelwyd. Mae'r trysorydd, Einion Jones, yn dal yn ei swydd ers y cyfnod hwnnw a'r ysgrifennydd Dilwyn Thomas yn ei swydd yntau ers 13 o flynyddoedd.

Hyd yn ddiweddar, bachgen ifanc lleol fyddai'n llunio'r gadair ac fe gâi ei chyflwyno gyda rhodd er cof am Mr a Mrs Williams, Gwynfryn. Yn 1975, y prifardd buddugol oedd Moses Glyn Jones o Fynytho, a hynny flwyddyn ar ôl iddo ennill y gadair yn Eisteddfod Genedlaethol Caerfyrddin.

Heddiw rhoddir Medal yr Ieuenctid am y gwaith llenyddol gorau i rai o dan 25 mlwydd er cof am yr achlysur hwnnw. Ymhlith cyn enillwyr y gadair i lenorion ifanc, sef model o gadair i rai dan 21 oed, mae Menna Elfyn a Meinir Pierce Jones.

Caiff yr eisteddfod ei rhannu yn dair rhan. Ar nos Wener, mi fydd pobl ifanc o dan 25 mlwydd oed yn cystadlu. Tro'r plant lleol yw hi b'nawn Sadwrn ac mae nos Sadwrn yn agored i oedolion o bob man.