Caiff yr eisteddfod yma ei chynnal yn ôl ei draddodiad ar ddydd Gwener y Groglith, ac hefyd y nos Iau cynt. Am dri o'r gloch b'nawn Gwener, bydd y gynulleidfa yn oedi i ganu emyn sy'n berthnasol i'r croesholi, emyn fel Cofiaf y Cyfiawn Iesu.

Daeth yn eisteddfod gadeiriol yn ystod y ganrif diwethaf ac mae bardd cadeiriol teilwng wedi bod bob blwyddyn ers hynny, yn ôl y sôn. Erbyn heddiw, bydd y bardd buddugol yn ennill cadair fechan, wedi'i llunio gan grefftwr lleol.

Yr oedd yn fagwraeth dda i gystadleuwyr oedd yn mynd yn eu blaenau i'r Eisteddfod Genedlaethol. Ymhlith y rhai sydd wedi cystadlu dros y blynyddoedd y mae Bryn Terfel, gan fod ei nain a'i daid yn byw ym Montnewydd a daeth Margaret Williams i gystadlu pan oedd hi'n fyfyrwraig yn y Coleg Normal, Bangor. Aeth Brian Owen, y Groeslon, ymlaen o'r eisteddfod yma i ennill yr adrodd yn yr Eisteddfod Genedlaethol, ac Alun Jones, Trawsfynydd, i ennill y rhuban glas hefyd.

Y ddiweddar Eluned Douglas Williams a fyddai'n cyfeilio i bawb dros y blynyddoedd.

Erbyn hyn, cynhelir yr eisteddfod yma ar y nos Iau a'r nos Wener yn unig. Ar y nos Iau mi fydd plant oedran ysgol gynradd y cylch yn cystadlu, ac mi fydd pobl ifanc ac oedolion o Gymry gyfan yn dod at eu gilydd ar y nos Wener.