Maent yn cynnal gweithgareddau cymdeithasol yn Wrecsam gan gynnwys nosweithiau cymdeithasol misol wedi eu hanelu at siaradwyr Cymraeg a dysgwyr profiadol a gweithgareddau i blant megis jambori awyr agored i blant ifanc ym Mharc Bellevue gyda'r diddanwr Martyn Geraint.

Mae'r Fenter hefyd yn cynnal gigs gyda rhai o artistiaid amlycaf y Sîn Roc Gymraeg yn perfformio ochr yn ochr â bandiau sydd â chysylltiadau a'r ardal megis No Star a ddaeth yn fuddugol ym Mrwydr y Bandiau C2 a Mentrau Iaith Cymru yn 2005 gan drechu bandiau o bob cwr o Gymru.

Yn ogystal â threfnu gweithgareddau eu hunain maent hefyd yn cefnogi gweithgareddau annibynnol a gaiff eu cynnal ar hyd a lled y Sir. Mae'r Fenter yn ddiweddar wedi bod yn ymwneud ag Eisteddfod Dyffryn Ceiriog fydd yn cael ei gynnal ym mis Mai a'r Ŵyl Gerdd Dant fydd yn ymweld â Rhosllannerchrugog yn Nhachwedd 2006.

Yn ôl Siôn Wynne, prif sialens y Fenter yw sicrhau bod plant a phobl ifanc y Sir yn sylweddoli maen nhw sy'n gyfrifol am ddyfodol a thynged yr iaith yn y Sir. Fel rhan o'r gwaith i geisio sicrhau bod siaradwyr Cymraeg ifanc y Sir yn cymryd perchnogaeth dros yr iaith mae'r Fenter wedi sicrhau grant o £5,000 gan y Loteri Genedlaethol. Bydd y grant yn galluogi'r Fenter i gynnal Fforwm Ieuenctid yn y Sir bydd yn rhoi cyfle iddynt godi pryderon am yr iaith yn eu hardal a threfnu gweithgareddau eu hunain.

Yn ogystal â'r ochr gymdeithasol i'r iaith Gymraeg mae'r Fenter hefyd yn hyrwyddo'r iaith yn sector breifat y Sir trwy roi gwybodaeth am grantiau sydd ar gael ar gyfer arwyddion dwyieithog, rhoi gwybodaeth am wersi Cymraeg i Oedolion ac annog mudiadau gwirfoddol eraill y Sir i wneud defnydd o'r iaith.

Am ragor o wybodaeth am beth all Menter Iaith Maelor wneud i chi, cysylltwch â Siôn Wynne ar 01978 363 791 neu drwy ysgrifennu at Menter Iaith Maelor yn 65 Stryt y Rhaglaw, Wrecsam. LL11 1PF.