"Mae enw Côr Meibion Y Rhos a chanu corawl ar ei orau yn gyfystyr trwy'r byd i gyd ers i'r côr gael ei sefydlu gan Richard Mills ym 1891.

"Ers hynny mae cynulleidfaoedd ym Mhrydain ac mewn llawer o wledydd eraill wedi cael eu swyno gan sain unigryw'r côr o bentref Rhosllannerchrugog ger Wrecsam.

"Yn ychwanegol mae recordiau a cryno ddisgiau'r côr wedi cael ei werthu ledled y byd ac mae carwyr cerddoriaeth dda yn cael cyfle i glywed y côr yn aml ar y radio a'r teledu.

"Maent wedi cael llwyddiant mewn nifer o gystadlaethau dros y blynyddoedd yn cynnwys bod yn Côr y Flwyddyn y BBC dwywaith ac ennill y brif wobr dwywaith yng Ngŵyl Gerddoriaeth Gymru HTV.

"Roeddynt yn fuddugol yn erbyn 112 o gorau eraill yn Wŷl Gerdd Glarner yn Y Swisdir ac maent wedi bod yn llwyddiannus sawl gwaith yn yr Eisteddfod Genedlaethol.

"Yn ychwanegol maent wedi ennill y wobr gyntaf yn Eisteddfod Gerddorol Ryngwladol Llangollen a bydd y côr yn cymryd rhan yn y cyngerdd i ddathlu pen-blwydd yr wŷl yn 60 oed.

"Mae'r côr wedi teithio'n aml i lefydd fel Unol Daleithiau America, Canada, Yr Almaen, Y Swisdir, Yr Eidal ac i Baris a chael derbyniad da lle bynnag maent wedi ymddangos. Ym mis Hydref byddent yn ymweld â Sbaen gydag un cyngerdd o'r tri yng Nghadeirlan Granada.

"Mae Côr Meibion y Rhos yn ymfalchïo yn y ffaith bod eu rhaglen yn cynnwys cerddoriaeth amrywiol o wahanol gyfnodau, megis emyn donau, caneuon o'r sioeau, baledi ac eitemau o fyd yr opera - yn wir, rhywbeth i bawb.

"Heb amheuaeth mae'r côr yn boblogaidd iawn, er enghraifft mae pob un o'u cyngherddau'r flwyddyn hon wedi bod o flaen cynulleidfa lawn.

"Gwerthwyd holl docynnau Cyngerdd Blynyddol y côr yn Wrecsam fis Hydref diwethaf bum mis cyn y noson - Katherine Jenkins oedd yr unawdydd gwadd - ac mae'r côr wedi canu gyda Bryn Terfel hefyd.

"Y tenor Rhys Meirion fydd yr unawdydd yn y Cyngerdd Blynyddol nesaf ar nos Sadwrn, Tachwedd 18, a bydd y pianydd disglair, oedd unwaith yn cyfeilio i'r côr, Llŷr Williams hefyd yn cymryd rhan. Afraid yw cyhoeddi bod y tocynnau am y cyngerdd yn brin iawn.

"Cyfarwyddwr Cerdd y côr ers mis Ionawr, 2005, yw John A. Daniel, un sy'n brofiadol iawn mewn cerddoriaeth o bob math. Graddiodd o'r Coleg Cerdd Brenhinol ym Manceinion ac mae'n beirniadu mewn eisteddfodau.

"Yr Is-Gyfarwyddwr Cerdd a'r cyfeilydd yw Kevin Whitley, sydd â gradd mewn cerddoriaeth o Brifysgol Cymru yng Nghaerdydd.

"Mae croeso'n aros i unrhyw un i ymuno â Chôr Meibion y Rhos. Mae'r ymarferion yn cael eu cynnal yng Nghlwb yr Hafod yn y Rhos pob nos Lun rhwng 7.15 a 9.15pm a phob nos Iau yn Y Stiwt yr un amser.

"Cadeirydd y côr yw J. Norman Davies (01829) 270210 a'r ysgrifennydd yw J. Raymond Jones (01978) 845219."