Saith oed oedd Woosnam pan gydiodd mewn clwb golff am y tro cyntaf. Dysgodd chwarae yng nghlwb golff Llanymynech ym Mhowys lle mae 15 o'r tyllau yng Nghymru a 3 dros y ffin yn swydd Amwythig!

Mae gwefan y clwb yn dwyn i gof ymateb rhai o'r aelodau pan gyhoeddodd Woosnam, neu Woosie i'w ffrindiau, ei fod am droi yn broffesiynol yn y 1970au.

Yn ôl y wefan, treuliodd grŵp ohonyn nhw ddyddiau yn erfyn arno i ailystyried - am eu bod yn credu nad oedd fawr gwell chwaraewr na miloedd o chwaraewyr amatur eraill, gan gynnwys nhw eu hunain, ac y byddai'n difaru'r penderfyniad.

Blynyddoedd cynnar anodd
Fe brofodd nhw'n anghywir, ond roedd ei flynyddoedd cynnar fel chwaraewr proffesiynol yn anodd. Ar ôl cymhwyso ar gyfer Cylchdaith Ewrop, treuliodd y pum mlynedd nesaf yn gyrru o amgylch y cyfandir mewn fan VW, gan fyw ar ffa pob, yn ôl y sôn.

Yn y diwedd, cafodd ei wobrwyo gyda buddugoliaeth yng nghystadleuaeth y Swiss Open yn 1982.

Yn 1987, enillodd wyth twrnameint, gan gynnwys Cpwn y Byd dros Gymru yn Hawaii ac ennill mwy o arian na neb arall ar y Gylchdaith Ewropeaidd: fo oedd yr Ewropead cyntaf i ennill mwy na miliwn o ddoleri mewn un tymor.

Daeth Woosnam hefyd yn Bersonoliaeth Chwaraeon y Flwyddyn yng Nghymru y flwyddyn honno ar ôl ennill un o'r prif gystadlaethau unigol - Teitl Chwaraewr Tyllau'r Byd - a miliwn o ddoleri yng nghystadleuaeth Sun City yn Ne Affrica.

Cyrraedd y brig
Yn 1988, enillodd Bencampwriaeth PGA Prydain. Dair blynedd yn ddiweddarach, roedd yn Rhif Un yn y byd ac yn dathlu buddugoliaeth yn un o bencampwriaethau mwyaf nodedig y byd golff - fel pencampwr yr US Masters 1991.

Mae wedi cynrychioli Cymru fwy na 15 o weithiau yng Nghwpan y Byd.

Yn 2001, torrodd record arall pan enillodd bencampwriaeth Cisco Chwarae Tyllau'r Byd yn Wentworth - daeth y 'Welsh Wizard' y chwaraewr cyntaf yn hanes y bencampwriaeth i ennill mewn tair degawd yn olynol (1987, 1990, 2001). Yn 43 mlwydd oed, fo hefyd oedd y chwaraewr hynaf i ennill y teitl.

Dydi lwc ddim wedi bod o'i blaid bob tro chwaith - yn 2001, collodd ddau drawiad a'i gyfle o ennill Pencampwriaeth Agored Prydain yn Lytham am fod ganddo'r nifer anghywir o glybiau yn eu fag.

Ar ei ben-blwydd yn 47 oed yn 2005, cyhoeddwyd bod Woosnam wedi ei ddewis yn gapten ar Dîm Ewrop yng Nghwpan Ryder 2006. Er i rai amau ei ddewis o chwaraewyr, arweiniodd y tîm i fuddugoliaeth, gan ennill OBE yn rhestr anrhydeddau'r Frenhines yn 2007.

Yn ddom ond 5tr 4m, ystyrir Woosnam yn un o chwaraewyr mwyaf hirhoedlog y gamp. Oddi ar y cwrs golff, mae'n rhestru pysgota, chwaraeon a snwcer fel ei ddiddordebau eraill (olynodd yr Arglwydd Archer fel Llywydd Cymdeithas Snwcer y Byd yn 1999) .

Mae ganddo ef a'i wraig, Glendryth, dri o blant ac mae'n byw yn Jersey ond yn ymweld yn gyson â Chymru.