Aeth i Ysgol Gynradd Bro Aled ac Ysgol Uwchradd Glan Clwyd cyn graddio gydag anrhydedd o Goleg Ivor Novello - Redroofs Theatre School, lle'r enillodd dlws 'Perfformiwr Mwyaf Addawol y Flwyddyn'.

Un o uchafbwyntiau ei gyrfa ifanc oedd perfformio yn y sioe Bugsy Malone ar lwyfan Theatr y Frenhines yn West End Llundain gyda'r National Youth Music Theatre. Yn 2008, daeth yn un o'r 12 gobeithiol ar y rhaglen I'd Do Anything sy'n cystadlu am ran Nancy yn y sioe Oliver! yn y West End.

Mae Tara wedi ymddangos ar lwyfannau ers pan oedd yn bedair oed gan gystadlu ar lwyfan Eisteddfod yr Urdd am y tro cyntaf pan oedd yn bump oed. Enillodd y gystadleuaeth dawnsio disgo yn wyth oed ac aeth ymlaen i gael llwyddiant mewn cystadlaethau dawnsio disgo, dawnsio gwerin, llefaru a chanu wedi hynny.

Mae'n priodoli llawer o'i llwyddiant fel perfformwraig i Eisteddfodau'r Urdd: "Mae'n fan cychwyn gwych. Pa wlad arall all roi cyfle i blentyn sefyll ar lwyfan o flaen miloedd i berfformio? Rydych yn dysgu delio â'r sefyllfa ac i beidio â bod yn nerfus," meddai.

Fe fyddai rhai'n dadlau fod perfformio yn y gwaed i Tara, sydd yn ferch i'r reslwr Orig Williams: mae'n dweud mai ei swydd waethaf oedd gweithio i gwmni ei thad pan roedd rhaid iddi lwytho a dadlwytho'r cylch reslo. Tra roedd ei rhieni'n gweithio, roedd Tara yn cael ei gwarchod gan 'Giant Haystacks a 'Mad Monk Rasputin'!

Mae hefyd wedi ymddangos yn y gyfres Caerdydd, Tri Tan y Manod, Y Bws Gwlad, Malu Canu, Aled & co ac fel aelod o'r grŵp Cic yn y rhaglen o'r un enw.

Cyhoeddodd ei CD gyntaf, 'Does Neb yn fy adnabod i' ar label Sain ac roedd yn rhan o'r cynhyrchiad o'r sioe gerdd 'Nia Ben Aur' yn 2003.

Erbyn hyn yn byw yng Nghaerdydd, hi oedd yr ieuengaf i'w gwneud yn aelod o Orsedd y Beirdd yn Eisteddfod Casnewydd pan oedd yn 20 oed.