Na, dydi'r actor Russell Crowe - arwr y ffilm Gladiator - ddim yn Gymro, ond mae ei deulu agos yn hanu o Wrecsam.

Ac mae gobeithion yn uchel y bydd yr actor yn hedfan i Gymru rhywbryd i gymryd rhan yn rhaglen hel achau'r BBC, Coming Home, gan ddilyn yn ôl troed Donny Osmond, Susan Sarandon ac Olivia Newton-John.

Yn 2001 darganfu Hilary Betts o Wrecsam bod y cricedwyr Jeff a Martin Crowe o Seland Newydd yn perthyn iddi o bell.

Wedyn, tra'n gwylio rhaglen deledu, clywodd fod Russell Crowe yn gefnder iddynt hwythau.

Darganfu Hilary bod hendaid Russell Crowe, dyn o'r enw Fred, a'i wraig Kezia, ynghyd â 12 neu 13 o blant, wedi ymfudo i Ganada yn 1925.

Canfuwyd erthygl mewn hen bapur newydd am eu hymadawiad, a'r ffarwel gawsant gan aelodau Capel y Bedyddwyr Stryd Gaer, Wrecsam, sydd yno hyd heddiw.

Roedd y teulu yn cadw siop groser, Crofruit. Arhosodd taid Russell, John, i redeg y busnes - roedd hefyd yn aelod o dîm polo dŵr Ysgol Grove Park yn y 20au.

Dychwelodd brawd hwnnw, Frank, o Ganada ar ôl dwy flynedd i helpu yn Crofruit.

Mae disgynyddion Frank yn Wrecsam hyd heddiw, Hilary yn eu mysg.

Yn fuan wedyn ymfudodd John i Seland Newydd, lle priododd. Ganed iddo ddau o blant: David ac Alex, tad Russell.

Er i Russell gael ei eni yn Seland Newydd ymfudodd ef a'i deulu i Awstralia pan oedd yn blentyn.

Roedd ei rieni yn darparu bwyd ar setiau ffilm ac fe ddechreuodd yntau actio fel plentyn - roedd yn Neighbours am bedair pennod.

Cyfarfu ei briod, yr actores Danielle Spencer, tra'n gwneud y ffilm The Crossing yn 1990. Mae ganddynt ddau o blant.

Ymysg ei hen gariadon y mae Meg Ryan - ac mae'n ffrindiau mawr efo Jodie Foster a Nicole Kidman.

Mae ei ffilmiau yn cynnwys: Romper Stomper, The Sum of Us, LA Confidential, Mystery, Alaska, Proof of Life, Gladiator, A Beautiful Mind, Master and Commander, Cinderella Man, 3:10 to Yuma ac American Gangster.