O Ysgol Faes Garmon i fryniau Hollywood, mae Rhys bellach yn un o sêr amlycaf Cymru. Er na chafodd ei ddymuniad a chael rhan gyda Sarah Michelle Gellar yn y ffilm Scooby Doo, mae Rhys yn seren Gymraeg go wahanol ond poblogaidd iawn ym myd y ffilmiau.

Fe ddechreuodd ei yrfa yn un o'r ddau Frank, (gyda Meirion Davies) ac yn dilyn llwyddiant cwlt y ffilm Twin Town gyda'i frawd Llŷr, fe enillodd Rhys gydnabyddiaeth fel Spikey yn y ffilm gomedi Notting Hill, gyda Hugh Grant a Julia Roberts, yn fwyaf nodedig mewn golygfa lle mae'n ateb y drws i'r paparazzi yn ei drôns! .

Fe gafodd ei ddewis i fod yn seren newydd ddisgleiriaf Hollywood gan ddarllenwyr y cylchgrawn Entertainment Weekly. Bu'n gweithio efo Robert Carlyle yn Once Upon a Time in the Midlands, Kevin Spacey a Judi Dench yn Shipping News a Tim Robbins yn Human Nature.

Mae'n cadw cysylltiad agos iawn â'i gartref ac wrth ddychwelyd i Ruthun ym Mawrth 2000 fe agorodd y Theatr £400,000 newydd sef Theatr John Ambrose. Anfonodd neges i'w hen ysgol hefyd ar achlysur pen blwydd yr ysgol yn ddeugain oed. Nododd Ysgol Maes Garmon yr achlysur efo llu o ddigwyddiadau a llyfr arbennig 121 tudalen gan Aled Lloyd Davies a'r athro Iwan Jones yn adrodd hanes yr ysgol.

Disgrifir Rhys yn y llyfr fel un i'w gofio'n annwyl. Gan nad oedd yn medru mynd i'r cyfarfod, fe anfonodd neges gan ymddiheuro ynddo am ei lawysgrifen sâl a gobeithiai hefyd fod ei sillafu'n gywir!

Mae rhieni Rhys yn athrawon lleol.

Ydych chi yn cofio Rhys Ifans yn blentyn? Oes gennych eich hoff ffilm? Ysgrifennwch aton ni gyda'ch straeon.