Dyma lansio blwyddyn arall o waith caled i ddod â goreuon y sin roc a phop Gymraeg i Abertawe ganol mis Hydref.

Cyflwynwyd y noson gan y digrifwr lleol, Ceri Phillips yn ei arddull unigryw ei hun. Cafwyd set i ddechrau'r noson gan Huw Dylan Owen, un o drefnyddion Tyrfe Tawe ers ei dechrau yn 2004, a chyn aelod o'r 'Defaid' a 'Gwerinos'. Perfformiodd lu o ganeuon gwleidyddol ar ei gitâr, ac fe fydd i'w weld yn perfformio eto ar lwyfan Tyrfe Tawe ym mis Hydref.

Roedd hi'n braf cael croesawu Tito Lewis i'r Noson Lawen ar ddiwrnod arwyddocaol i Batagonia, ei ardal enedigol. I ddathlu pen-blwydd Patagonia yn wladfa, perfformiodd gân werin draddodiadol yn Sbaeneg ac fe orffennodd gyda 'Bugeilio'r Gwenith Gwyn' i ddod yn ôl i Gymru.

I dorri ar y canu, perfformiodd Heledd Mitchell gyfres o alawon ar y delyn, gan gynnwys 'Cân Walter' gan Meic Stevens a phib-ddawns draddodiadol. Dyma gyfle i ymlacio a chael blas ar ganu'r delyn ar ei orau.

Uchafbwynt y noson oedd y gantores Lowri Evans, gyda Lee Mason yn gitarydd gyda hi. Roedd ei llais hi ar y noson yn wefreiddiol a chyfareddwyd y dorf gan ei halawon Katie Melua-aidd. Roedd ei chaneuon hi'n cynnwys 'Mr Cwmwl Gwyn', 'Merch y Myny' a 'Swp-y-Star' oddi ar yr albwm 'Clyw Sibrydion', ynghyd â chymysgedd o ganeuon newydd.

Ar ran gweddill criw Tyrfe Tawe, diolch i'r holl berfformwyr am greu noson o gyffro a mwynhad, ac am roi o'u hamser i ddod i Dŷ Tawe. Rydym yn gwerthfawrogi'r cyfraniad yn fawr iawn.

Mawr obeithio y bydd cefnogaeth fawr i ni ym mis Hydref. Yn y cyfamser, ewch i www.tyrfe-tawe.com am y datblygiadau diweddaraf.

Gan Alun Rhys Chivers