Ganwyd Robert Croft yn Nhreforus yn 1970 ac fe wnaeth ei ymddangosiad cyntaf gyda thîm Morgannwg yn 1989 yn dilyn ymddeoliad Rodney Ontong. Dewiswyd ef i dîm A Lloegr ar daith yn India'r Gorllewin yn 1991-92 ac ennill ei gap ar ôl cymryd 68 wiced yn nhymor 92.

Fe deithiodd i Dde Affrig gyda'r tîm ac yno y dechreuodd ennyn sylw am ei sgiliau batio hefyd ac fe'i cynhwyswyd yn nhîm Lloegr ar gyfer prawf olaf haf 1996 yn erbyn Pacistan.

Yn 1997, enillodd Morgannwg y bencampwriaeth ac yn ystod gaeaf 1997 fe aeth ar daith efo Lloegr i Sharjah ac India'r Gorllewin. Yn dilyn hyn roedd ei ymddangosiad nesaf yn y gyfres undydd efo'r Springboks a'r Sri Lanciaid.

Yn ystod 1998-99 fe hafalodd record y clwb am ymddangosiadau prawf pan enillodd ei 15fed cap yn ystod cyfres y Lludw.

Ym Mawrth 1999 enwyd Croft ym mharti Lloegr ar gyfer Cwpan y Byd a'r cyntaf o Forgannwg i chwarae yn y gystadleuaeth ac fe chwaraeodd wedyn yn y gyfres yn erbyn Indiaid y Gorllewin yn 2000.

Yn 2001 fe'i dewiswyd i'r sgwad prawf ar gyfer taith y gaeaf i'r India a Seland Newydd, ond roedd o'n un o'r chwaraewyr a wrthododd fynd ar sail yr holl ofnau diogelwch yn dilyn ymosodiadau terfysgwyr yn Efrog Newydd a'r ansicrwydd gweleidyddol ar gyfandir India.

Yn 2002 enwyd ef yn is-Gapten Morgannwg. Ym Medi y flwyddyn hon enillodd Morgannwg deitl Cynghrair Cyntaf Norwich yn erbyn Swydd Gaint yn Nghaergaint a hynny dan gapteiniaeth Croft ei hun.

Ymhlith llawer o ddilynwyr criced Croft yw'r chwaraewyr mwyaf amryddawn ers Fred Titmus.

Ei funud fawr: sgorio 143 yn erbyn Gwlad yr Haf yn Taunton yn 1995.

Synodd Robert Croft y byd yn Ionawr 2004, pan gyhoeddodd ei fod am ymddeol o'r gêm rhyngwladol, a rhoi ei holl sylw a'i egni fel capten i Forgannwg.