"Deunaw mis 'nôl cefais swydd gyda Chyngor Gweithredu Gwirfoddol Cymru yn ei Uned Cofnodion Troseddol. Mae'r Cyngor yn gwasanaethu gwahanol fudiadau gwirfoddol yng Nghymru a gwaith yr uned yw hyrwyddo'r broses o gael Datgeliadau Troseddol o'r CRB yn Lerpwl. Fy ngwaith i yw mynd at y mudiadau a'u dysgu sut i ddefnyddio'r uned yn effeithiol i gael y Datgeliadau gyda'r lleiaf o anhawster.

"'Dwi'n teithio De Cymru ac yn cwrdd â phobl anhygoel o roddedig ac yn cael croeso mawr oherwydd fod pawb wedi drysu'n llwyr am ofynion y pwnc llosg yma. Gobeithiaf fy mod yn gwneud pethau yn gliriach a bod y mudiadau yn cael bywyd yn haws oherwydd bodolaeth ein huned ni.

Hobi'r teulu
"Pan gwrddais â fy ngŵr, mewn twmpath ddawns, dywedodd ei fod yn aelod o'r Sealed Knot. Gwyddwn am y Sealed Knot fel mudiad cyfrinachol yn ystod rheolaeth Oliver Cromwell oedd yn gweithio i ddod â Siarl II yn ôl i ber a gofynnais ddim rhagor am y mudiad. Cynigiais 'lifft' ychydig o ddiwrnodau'n ddiweddarach a phan agorais y drws dyna lle yr oedd yn ei wisg C17 a'i gleddyf ar draws ei bac!!

"Wythnos ar ôl hynny es i frwydr yn Northampton gydag e' a thri mis wedyn priodon ni. Magwyd y merched yn y Knot ac 'roeddent yn galw eu gwisgoedd C17 yn 'wisg gwersylla'!

"Diddordeb y gŵr a'r ferch Eiluned yw brwydro. Mae'r milwyr yn defnyddio'r drefn ar gyfer brwydro a ddefnyddiwyd yn y C17 a hyd yn oed yn chwarae'r un gemau dis a chardiau â milwyr y C17. Bu'r ddau yn bicellwyr ar un cyfnod ond mae'r gŵr 'nawr yn fysgedwr ac Eiluned yn cario negeseuon rhwng y swyddogion sy'n rheoli'r frwydr. Cyn gadael am y brifysgol 'roedd Anwen yn ddrymiwr. Rhaid i'r merched gwisgo fel dynion wrth gwrs - ychydig o fenywod oedd yn dilyn y fyddin yn y C17.

"Fy niddordeb i, fel sawl un arall, oedd hanes gwisg a chrefftau gwledig. Gwnawn dipyn o ymchwil ar y pwnc rhyngddom a ry'm ni'n falch i rannu'r wybodaeth gyda recriwtiaid newydd a'r cyhoedd. Mae Steve o Abertridwr wedi ymchwilio hanes sbectolau ac wedi gwneud rhai cywir i'r cyfnod ar gyfer llawer o ffrindiau.

"Mae Nic o Bontypridd wedi gwneud set o offer deintydd/llawfeddyg sy'n hel ofn / denu unrhyw blant sy'n ymweld â ni! Mae eraill wedi ymchwilio ryseitiau'r cyfnod, ymarfer gwneud cannyllau gwêr a chŵyr, troelli gwlân a llaw a defnyddio dulliau ac offer cywir ar gyfer gwau a gwnïo. Mae rhai yn gwersylla mewn pebyll cywir i'r cyfnod ac yn bwyta bwyd yr C17 ond 'dwi'n hoff o fy ngharafán fodern ar gyfer y nos, yn enwedig os yw'n wlyb ac mae'r stôf nwy yn haws na than coed!

"'Ry'n ni'n brwydro dros y wlad ac mae rhai yn mynd i'r cyfandir ac i'r Unol Daleithiau. Mae'n ffordd dda o gwrdd a chymysgedd o bobl o bob math.