Dw i'n cofio dyddiau hir yr haf ym mharc Ynysangharad, yn chwarae pêl-droed a chriced gyda'm ffrindiau ac wrth gwrs ar yr adeg hynny roedd yna siawns i ni i fynd i nofio yn y 'baths' awyr agored.

Erbyn hyn, dw i wedi troi'n ddeg ar hugain gyda gwraig a dwy ferch fach ac mae'n destun tristwch mawr i fi bod safon y dref, o ran cyfleusterau, wedi dirywio cymaint yn y pymtheg i ugain mlynedd diwethaf, fel bod yna bron ddim byd i'r bobl ifanc i wneud yng nghanol y dref.

Mae safon y farchnad, a oedd ar un adeg yn enwog ar hyd a lled y wlad, yn warthus ac yn edrych yn frwnt. Yn y gorffennol roedd bron pawb o'r cymoedd yn gwneud pwynt o ddod i'r farchnad bob bore Sadwrn ac yr yr adegau hyn, prin iawn oedd dyn yn gallu symud oblegid y tyrfaoedd. Roedd y lle yn llawn bywyd ac yn faethu awyrgylch dinesig bron a bod.

O ran dirywiad y dref, mae yna nifer o bobl sy' wedi ein cynrychioli ni ar y Cynghorwyr lleol ac sy' wedi ein cynrychioli ni yn San Steffan a'r Cynulliad wedi gwneud cam â'r dref, eu pobl a'r genedl sydd i ddod trwy beidio a gwneud digon i atal yr hyn sy wedi digwydd i'n tref dros y blynyddoedd diwethaf yma. Mae yna dyletswydd arnom ni hefyd, fel aelodau'r cyhoedd i wneud yn siŵr fod safon y dref yn codi ac mae'n rhaid i ni hefyd rhoi pwysau ar y rhai sy'n ein cynrychioli ni yn y goridorau grym, i ddechrau gweithio gyda'i gilydd i ddod i ryw gytundeb ar sut i symud y dref ymlaen a'i llusgo i fewn i'r ganrif bresennol.

Dw i'n falch i weld erbyn hyn, fod pethau wedi symud ymlaen i raddau helaeth. Er enghraifft gweler bod 'Alfred's' a'r 'Oriental Buffet' a'r 'Wetherspoons' newydd ar y Tymbl, wedi profi i fod yn bwytai a llefydd cymdeithasol poblogaidd iawn. Ac wrth gwrs, cynhaliwyd cyngerdd 'Tom Jones' yn y parc a phrofodd hyn i fod yn llwyddiannus iawn yn ariannol.

Y sibrydion ydy bod yna nifer o gyngheddau o'r fath ar y gweill. Fel y gwelwn, gall fod dyfodol llewyrchus i'r dref ymhob ffordd, os fagir yr ewyllys iawn ymhlith pawb sy'n gysylltiedig â'r dref a phawb sy'n caru'r dref hon a'r rhinweddau a sefydlodd y dref hon fel un o drefi pwysica Cymru yn y dyddiau a fu.
Dai Edwards o Bontypridd, Mehefin 2005

Ydych chi'n cytuno neu yn anghydweld â sylwadau Dai? Oes gennych chi unrhyw sylwadau arall i wneud am eich tref chi? Dyma eich cyfle chi i gyfrannu, a dweud eich dweud am eich Ponty chi. Llenwch y ffurflen isod.