 | | Alexander
yn siom fawr
Methu darlunio
mawredd realiti |
Sylwadau wythnosol Aled Edwards
Ionawr 9 2005
 Bûm yn edrych ymlaen ers wythnosau lawer i weld ffilm epig newydd Oliver Stone, Alexander.
Yn fy mrwdfrydedd roeddwn ymysg y cyntaf i'w gweld yng Nghaerdydd yr wythnos hon.
O ymchwilio ychydig i hanes Alexander, roeddwn yn gobeithio'n fawr y byddai'r ffilm yn trafod athrylith milwrol yr arwr o Facedonia a aeth ymlaen nid yn unig i wthio ffiniau'r byd ond i'w goncro hefyd.
Cafwyd haid o sêr ymysg y goreuon yn Hollywood er mwyn sicrhau llwyddiant y cyfan: Colin Farrell, Angelina Jolie, Val Kilmer, Anthony Hopkins, Jared Leto, Rosario Dawson, Gary Stretch, Jonathan Rhys-Meyers, Elliot Cowan, Rory McCann, Raz Degan a Brian Blessed.
Hel atgofion
Mae'r ffilm yn dechrau gyda Ptolemy (Anthony Hopkins) yn hel atgofion ac yn eu hysgrifennu ar gyfer hanes.
I Ptolemy, roedd methiannau Alexander yn rhagori ar lwyddiannau dynion eraill.
 Dywedir weithiau, yn yr un modd, bod ffilm wael o eiddo Oliver Stone yn fil gwell na ffilmiau cyfarwyddwyr eraill.
Efallai bod hynny'n wir ond ffilm wael oedd hon ar y cyfan.
Er tegwch, ni allai unrhyw actor neu gelfyddyd wneud tegwch â dyn a deithiodd dros 20,000 o filltiroedd gan goncro'r cyfan a aeth o'i flaen.
Wedi dweud hyn, roedd y dechneg o gael Ptolemy i adrodd sawl hanes o bwys yn dechneg hynod o siomedig.
Gan fy mod wedi mynd i'r drafferth o wybod rhywfaint am athrylith milwrol Alexander roeddwn yn ysu gweld y cyfan. Fe gefais fy siomi.
Pethau od
Mae tad Alexander, Philip o Facedonia, yn cael ei ddarlunio fel dipyn o iob. Roedd gan y dynion o Facedonia acenion a oedd yn swnio'n Wyddelig braidd.
Os oedd hynny'n wirion, roedd yr acen a roddwyd i Olympias druan, mam Alexander, yn hynod o od.
Treuliodd Angelina Jolie y ffilm yn siarad fel rhywun o Transylvania. Gan ei bod bron yn gwisgo nadroedd cafwyd y teimlad nad oedd y wraig hon yn real.
O weld y cecru rhyfeddol rhwng mam a thad Alexander, nid syndod efallai oedd iddo ffoi i fannau pell y byd gan briodi Roxane (Rosario Dawson).
Gwleidyddiaeth
Mae'n debyg taw'r hyn a gododd y cyfog mwyaf arnai oedd yr ymresymu a gafwyd dros goncro a lladd pobl er mwyn eu rhyddhau o ormes. Gobeithiaf yn fawr nad bwydo gogwydd Americanaidd er mwyn gwerthu'r ffilm oedd amcan hyn.
Cafwyd rhyw fath o rwdlan o gwmpas rhyddhau holl bobl y byd yn rhagori fel gorchwyl ar y cyfan a wnaeth Achilles a Herakles heb sôn am Prometheus ei hun.
Agwedd arall ar ddiwylliant cyfoes America a gafodd ddylanwad ar y ffilm oedd amharodrwydd y gwaith i ddangos bod ymwneud rhywiol dynion â dynion eraill ym myd gwlad Groeg y cyfnod yn wahanol i'r hyn a fyddai diwylliant America am ei weld ar ffilm heddiw.
Oherwydd hyn, caniatawyd llawer gormod o le a gofod ar gyfer awgrymu perthynas rhwng Alexander a Hephaistion.
Y frwydr fawr
I mi, yr hyn sy'n gwneud y ffilm yn un gwerth i'w gweld yw brwydr fawr Guagamela yn erbyn lluoedd Darius.
 Y mae'r berthynas rhwng y lladd gwaedlyd ar y ddaear a'r hyn y mae'r duwiau yn ei weld o'r awyr yn gweithio'n dda.
Y mae'n bechod nad oedd gweddill y ffilm cystal gan i mi adael y sinema yn atgoffa fy hun na all holl gelfyddyd a dawn marchnata dyn ddarlunio mawredd realiti.
Efallai, mewn wythnos drychinebus fel hon, taw da o beth yw hynny.
Ebostiwch ymateb
| |
  |  |
|  | | Y Parchedig Aled Edwards yn rhoi'r byd yn ei le. |  |
|
|
|
Cofio Gwenynen Gwent