Roedd hi'n edrych yn weddol gyfforddus i Gymru ar yr hanner wrth arwain 11-21 ar ôl i Morgan Stoddart a Sam Warburton groesi yn dilyn cais cynnar Gonzalo Canale.
Ond tyfodd hyfer yr Eidal yn yr ail hanner wrth fanteisio ar gamgymeriadau'r ymwelwyr, a phum pwynt oedd ynddi pan diriodd Sergio Parrise am ail gais ei dîm wedi 50 munud.
Amddiffyn am eu bywyd oedd hanes Cymru am weddill yr hanner, ac roedd y rhyddhad yn amlwg pan lwyddodd James Hook i agor y fantais i ddau sgôr gydag wyth munud i fynd.
Llwyddodd Stephen Jones gyda thair gôl gosb a throsiad at y pyst, ond fe fethodd yr Eidalwyr gyda phedair ymgais, a dyna brofodd i fod y gwahaniaeth rhwng y ddau dîm.
Roedd hi'n chwarter awr agoriadol llawn cyffro wrth i Gymru groesi am ddau gais wrth ymateb i sgôr cynnar Canale i'r tîm cartref.
Gôl gosb gyntaf Jones wedi tri munud cychwynnodd y sgorio, ond roedd yr Eidal ar y blaen dau funud yn ddiweddarach wrth i'r asgellwr gasglu ei gic ei hun ymlaen i dirio wedi camgymeriad clo Cymru Bradley Davies.
Ymatebodd yr ymwelwyr yn syth wrth i Stoddart wasgu drosodd yn y gornel chwith ar ôl i Hook rwygo drwy'r amddiffyn cartref.
Roedd hi'n gyfartal 8-8 wrth i Mirco Bergamasco lwyddo gyda gôl gosb, ond yn syth o'r ail-ddechrau, sgoriodd Cymru eu hail gais.
Lee Byrne oedd y pensaer tro yma wrth fylchu lawr canol cae. Roedd Hook ar ei ysgwydd i barhau'r symudiad ac amserodd y canolwr ei bas yn berffaith i ryddhau Warburton am ei gais rhyngwladol gyntaf.
Croesodd Byrne y llinell gais wedi 34 munud, ond cafodd dathliadau'r cefnwr eu difethaf wrth i'r dyfarnwr sylwi bod y bas olaf gan Shane Williams wedi mynd ymlaen.
Gorffennodd yr hanner - un digon cymysglyd o ran safon chwarae Cymru - gydag un gôl gosb i Bergamasco a dwy i Jones, gan sicrhau mantais o 11-21 i'r ymwelwyr.
Heb os, yr Eidal ddechreuodd yr ail hanner orau, ac yn llawn haeddu'r cais gan y capten Parisse.
Camgymeriad arall arweiniodd ati wrth i Williams a Jones wneud smonach yng nghanol cae, gan adael i'r Azzurri osod sylfaen ymosodol berffaith yn 22 Cymru.
Daeth y bêl allan o'r sgarmes yn sydyn, ac roedd Parisse yn rhy gryf i Jones wrth iddo hyrddio dros y llinell yn y gornel chwith.
Roedd hyder yr Eidalwyr yn codi'n raddol wrth i'r gêm droi i mewn i frwydr gorfforol ymysg y blaenwyr, a Chymru'n methu cael eu dwylo ar y bêl.
A phan ddaeth y bêl yn ôl at yr olwyr, roedd Jones, Byrne a Hook yn euog o wastraffu cyfle i ymosod wrth gicio'n ddibwrpas lawr y cae.
Daeth ychydig o feddiant i'r Cochion o'r diwedd yn nwfn yn hanner yr Eidal gydag wyth munud i fynd, ac ar ôl methu ag agor yr amddiffyn, bu'n rhaid bodloni ar gôl adlam gan Hook i agor mantais o wyth pwynt.
Digon cyfforddus oedd y munudau olaf i Gymru, wrth i'r gêm ddirywio'n sylweddol o ran safon oherwydd cam-drafod cyson.
Osgoi colli oedd prif nod Cymru wrth deithio i Rufain, ac er bod hynny wedi ei gyflawni, fe brofodd y perfformiad yn yr ail hanner bod camgymeriadau sylfaenol yn parhau yn bla yn chwarae tîm Warren Gatland.
Yr Eidal: Luke McLean; Andrea Masi, Gonzalo Canale, Alberto Sgarbi, Mirco Bergamasco; Kristopher Burton, Fabio Semenzato; Salvatore Perugini, Leonardo Ghiradlini, Martin Castrogiovanni, Santiago Dellape, Quintin Geldenhuys, Alessandro Zanni, Robert Barbieri, Sergio Parisse.
Eilyddion: Carlo Festuccia, Andrea Lo Cicero, Valerio Bernabo, Manoa Vosawai, Pablo Canavosio, Luciano Orquera, Tommaso Benvenuti.
Cymru: Lee Byrne (Gweilch); Morgan Stoddart (Scarlets), James Hook (Gweilch), Jamie Roberts (Gleision); Stephen Jones (Scarlets), Mike Phillips (Gweilch); Paul James (Gweilch), Matthew Rees (Scarlets, capt), Craig Mitchell (Gweilch), Bradley Davies (Gleision), Alun Wyn Jones (Gweilch), Dan Lydiate (Dreigiau), Sam Warburton (Gleision), Ryan Jones (Gweilch).
Eilyddion: Richard Hibbard (Gweilch), John Yapp (Gleision), Jonathan Thomas (Gweilch), Josh Turnbull (Scarlets), Tavin Knoyle (Scarlets), Rhys Priestland (Scarlets), Leigh Halfpenny (Gleision).
Dyfarnwr: Wayne Barnes (RFU).
