Roedd McBryde yn rhan o dîm hyfforddi Gareth Jenkins wrth i gais hwyr Graham Dewes sicrhau buddugoliaeth o 38-34 i Fiji yn Nantes, ac yn rhwystro Cymru rhag cyrraedd rownd yr wyth olaf yn y broses.
Collodd Jenkins ei swydd yn sgil y canlyniad yna, ac wrth i'r ddau dîm baratoi i gwrdd am y tro cyntaf ers hynny nos Wener, dywed McBryde bod y gêm yn dal i frifo.
"Mae o dal yn gysgod dros y chwaraewyr oedd wedi cymryd rhan yn y gêm yna, does 'na ddim amheuaeth," meddai McBryde.
"Mae hynny [y canlyniad] wedi cael ei drafod ar ddechrau'r wythnos, ond mae pethau'n gallu newid yn gyflym iawn yn rygbi.
"'Da ni wedi canolbwyntio mwy ar eu gêm nhw'r wythnos diwethaf yn erbyn Ffrainc yng nghanol y gwynt a'r glaw, a hefyd mynd yn nol i'r haf pan oedden nhw'n chwarae gyda'i gilydd.
"'Da ni wedi canolbwyntio ar y gemau yna ond mae'r ddraenen o golli yn erbyn Fiji yng Nghwpan y Byd dal yna hefyd."
Colli 34-12 wnaeth Fiji yn erbyn Ffrainc ddydd Sadwrn, ac mae'r hyfforddwr Sam Domoni wedi gwneud wyth newid ar gyfer y gêm yng Nghaerdydd.
Bydd chwe aelod o'r garfan a gurodd Cymru tair blynedd yn ôl - gan gynnwys y prop Dewes, sydd ar y fainc - yn bresennol yn Stadiwm y Mileniwm.
Mi fyddai hynny'n wyth oni bai bod Seru Rabeni a Wame Lewaravu wedi cael eu rhwystro rhag gadael Ffrainc oherwydd problemau gyda'i fisas.
Cymru: Lee Byrne; George North, James Hook, Andrew Bishop, Aled Brew; Dan Biggar, Richie Rees; Paul James, Huw Bennett, Adam Jones, Ian Gough, Deiniol Jones, Ryan Jones (capten), Dan Lydiate, Jonathan Thomas
Eilyddion: Richard Hibbard, John Yapp, Bradley Davies, Toby Faletau, Mike Phillips, Stephen Jones, Tom Shanklin.
Fiji: J Matavesi; M Tagicakibau, A Vulivuli, G Lovobalavu, V Goneva; S Bai, N
Kenatale; C Ma'afu, V Veikoso, D Manu (capten), I Rawaqa, J Qovu, S Saukawa, M
Ravulo, S Koyamaibole.
Eilyddion: T Talemaitoga, G Dewes, S Kalou, A Qera, S Taka, R Ratu, T
Rawaqa.
