Gyda Mike Phillips a Dwayne Peel yn absennol bu'n rhaid i Gatland ddewis rhwng Cooper, Richie Rees neu Martin Roberts i wisgo'r crys rhif 9. Cooper, sydd wedi ennill 44 o gapiau dros Gymru, sydd wedi derbyn sêl bendith Gatland tra bod Rees, sydd eto i ennill cap rhyngwladol i'r tîm llawn, ar y fainc.
Fel cyfarwyddwr o'r Gleision, mae cyn fewnwr Cymru Edwards wedi gweld Cooper a Rees yn gyson y tymor hwn.
"Yn fy marn i dyma'r dewis gorau i ddechrau'r gêm," meddai cyn gapten Cymru.
"'Dwi'n credu bod Warren Gatland wedi mynd am brofiad Gareth Cooper, does dim amheuaeth am hynny.
"Falle dyna'r peth iawn hefyd gan ein bod yn chwarae yn Twickenham.
"Mae'n mynd i fod yn gêm gystadleuol ac yn gêm anferth ac mae profiad yn beth pwysig ofnadwy.
"Mae Richie Rees wedi chware'n dda yn ystod y tymor ac ar brydiau y gwirionedd yw ei fod wedi chwarae'n well na Gareth.
"Ond mae'r profiad mawr 'da Gareth - mae e wedi bod yn y sefyllfa yma ac yn brofiadol dros y blynyddoedd.
"Ond mae Richie wedi dangos ei fod yn gallu dod ymlaen ac yn eilydd arbennig.
"Mae'n rhoi llawer o bwrpas i gêm ac mae'n gallu dod ymlaen a gwneud gwahaniaeth.
"Efallai bod yn well bod e'n dod arnodd fel eilydd."
Chwaraewr arall o'r Gleision sydd wedi ei ddewis yn y tîm ar draul un o'i gyd chwaraewyr rhanbarthol yw Tom James.
Mae James wedi cael ei ddewis fel asgellwr yn hytrach na Leigh Halfpenny, fydd ymysg yr eilyddion ddydd Sadwrn.
Fe fydd James, sydd wedi ennill wyth cap dros ei wlad, yn dechrau ei gêm gyntaf ym Mhencampwriaeth y Chwe Gwlad.
"Mae Tom wedi bod ychydig bach yn dawel yn ystod y tymor," meddai Edwards.
"Ond mae Tom 'da'r gallu, da ni gyd yn gwybod hynny ac mae e hefyd yn ddeinamig. Mae fe'n gallu gwneud rhywbeth mas o ddim byd.
"Mae fel rhywbeth yr oedd John Bevan arfer ei wneud yn y saithdegau."
