Y tîm cartref reolodd yr hanner cyntaf o ran meddiant a thiriogaeth, ond tri phwynt o droed Rhys Priestland oedd eu hunig wobr am yr holl bwyso.
A syfrdanwyd y cefnogwyr cartref pan groesodd Wayne Evans am gais i'r Dreigiau eiliadau cyn hanner amser i agor mantais o 3-10.
Evans ei hun ddechreuodd y symudiad wrth gymryd cic gosb sydyn yn ddwfn yn hanner ei hun, ac yna casglodd y mewnwr gic letraws Jason Tovey i sgorio yng nghysgod y pyst.
Daeth y sgôr gydag asgellwr y Dreigiau, Aled Brew, yn eistedd yn y gell gosb.
Serch hynny, ymatebodd y Scarlets yn wych wedi'r toriad wrth i Gareth Maule fanteisio ar gainc yn amddiffyn yr ymwelwyr i sgorio.
Trosodd Priestland, cyn i'w ail gôl gosb roi'r Scarlets ar y blaen am y tro cyntaf yn y gêm wedi 46 munud o chwarae.
Roedd gwell i ddod gan y maswr pan orffennodd symudiad slic ymysg yr olwyr i agor mantais o wyth pwynt gydag wyth munud yn weddill.
Ond roedd y canlyniad yn y fantol unwaith eto pedwar munud yn ddiweddarach pan gasglodd Brew gic Tovey i groesi yn y gornel chwith am ail gais y Dreigiau.
Disgyn yn fyr wnaeth ymdrech y maswr i ychwanegu'r ddau bwynt, a doedd dim ffordd yn ôl i'r ymwelwyr pan lwyddodd Priestland gyda gôl gosb o bell gyda dau funud yn weddill.
Scarlets: Dan Newton; Morgan Stoddart, Gareth Maule, Jon Davies, Sean Lamont; Rhys Priestland, Tavis Knoyle; Iestyn Thomas, Matthew Rees (capt), Phil John, Vernon Cooper, Jonny Fa'amatuainu, Rob McCusker, Josh Turnbull, David Lyons.
Eilyddion: Ken Owens, Rhodri Jones, Simon Gardiner, Damian Welch, Ben Morgan, Martin Roberts, Regan King, Lee Williams.
Dreigiau: Will Harries; Adam Hughes, Tom Riley, Ashley Smith, Aled Brew; Jason Tovey, Wayne Evans; Hugh Gustafson, Tom Willis (capt), Ben Castle, Luke Charteris, Scott Morgan, Dan Lydiate, Gavin Thomas, Toby Faletau.
Elyddion: Steve Jones, Pat Palmer, Phil Price, Adam Jones, Lewis Evans, Patrick Leach, Jonathan Evans, Matthew Jones.
Dyfarnwr: Tim Hayes (URC).
