Manteisiodd y Gweilch ar ddiffyg disgyblaeth gan y Scarlets i groesi am saith cais a sicrhau pwynt bonws.
Y maswr Dan Biggar oedd seren y tîm cartref gan gyfrannu 26 o bwyntiau, oedd yn cynnwys cais mewn gornest un ochrog.
Yr oedd y gêm wedi cael ei ail threfnu ar gyfer prynhawn Llun yn dilyn gohiriad hwyr ar Ŵyl San Steffan.
Cafodd y gêm ei gohirio am resymau iechyd a diogelwch oherwydd bod pibellau dŵr yn Stadiwm Liberty wedi rhewi.
Yr ymwelwyr gafodd y dechrau delfrydol gyda chic hyfryd Rhys Priestland yn sicrhau tri phwynt wedi pum munud.
Roedd y Gweilch yn gyfartal bedwar munud yn ddiweddarach gyda Dan Biggar yn llwyddo gyda chic gosb llawer haws.
Sicrhaodd Biggar cant o bwyntiau am y tymor wrth i'w gic gosb lwyddiannus wedi 13 munud roi'r tîm cartref ar y blaen am y tro cyntaf yn y gêm.
Cynnig cywrain arall gan Biggar welodd y Gweilch yn agor bwlch o chwe phwynt gyda 18 munud ar y cloc.
Daeth y cais agoriadol wedi 24 munud gyda James Hook yn croesi yn y gornel i ymestyn mantais y tîm cartref.
Pas wych Tommy Bowe dyma'n canfod Hook ar yr asgell chwith ac ni lwyddodd Morgan Stoddart a Sean Lamont i rwystro canolwr Cymru.
Cadarnhaodd y dyfarnwr fideo bod y cais yn ddilys ac er methodd Biggar gyda'r trosiad, roedd y Gweilch yn deilwng ar y blaen o 14-3.
Ar ôl methu a throsi'r cais roedd Biggar yn llwyddiannus gyda gôl gosb rhwydd o flaen y pyst gyda saith munud o'r hanner cyntaf yn weddill.
Roedd amser yn weddill i Biggar i sgorio ei bumed gôl gosb o'r prynhawn wrth i'r Gweilch gyrraedd yr ugain pwynt.
Ni chafodd y Scarlets y dechrau gorau i'r ail hanner gyda Martin Roberts yn derbyn y cerdyn melyn am regi at y dyfarnwr James Jones.
Gyda'r Scarlets dyn yn brin fe fanteisiodd y Gweilch ac wedi cyfnod yn pwyso fe groesodd Jonathan Thomas am gais yn y cornel, gyda Biggar yn trosi.
Roedd y Scarlets yn awr yn cwrso'r gêm ond ar ôl i Priestland weld y bêl yn adlamu i ddwylo Biggar fe fanteisiodd y maswr dyma'n rhedeg hanner hyd y maes cyn croesi am drydedd cais ac yna'n trosi'n llwyddiannus.
Serch hynny roedd yr ymwelwyr i daro'n ôl gyda Gareth Maule yn croesi yn y gornel yn dilyn rhediad grymus gan Lamont.
Llwyddodd Priestland gyda'r trosiad i ddod o fewn dau bwynt i gant o bwyntiau am y tymor.
Sean Lamont oedd yr ail chwaraewr o'r Scarlets i dderbyn y cerdyn melyn gyda'r dyfarnwr o'r farn i'r Albanwr ddefnyddio ei ben-lin yn uchel yn y dacl ar Mike Phillips.
A tra roedd Lamont yn y gell gosb roedd y Gweilch i sgorio cais arall gyda Richard Fussell yn croesi am gais unigol gwych, ei chweched o'r tymor, i hawlio'r pwynt bonws.
Fe ychwanegodd Biggar ddau bwynt arall at gyfanswm y Gweilch, oedd bellach ar y blaen 39-10.
Roedd y llifddorau bellach ar agor wrth i Tommy Bowe frasgamu'n hyderus cyn tirio'r bêl yn y gornel am bumed cais y Gweilch gyda Biggar yn trosi.
Bu'n rhaid i'r dyfarnwr James Jones ymgynghori gyda'r dyfarnwr fideo er mwyn cadarnhau chweched cais y Gweilch, sgoriwyd gan Paul James.
James Hook, yn hytrach na Biggar, dyma'n ymgymryd â'r dyletswyddau cicio ond yr un oedd y canlyniad gyda'r trosiad yn llwyddiannus.
Roedd y tîm cartref hefyd yn euog o ddiffyg disgyblaeth wrth i'r eilydd Ian Evans gael ei yrru i'r gell gosb am ddefnydd anghyfreithlon o'r droed.
Roedd y Scarlets i sgorio ail gais yn hwyr yn y gêm, gyda chais Jonny Fa'amatuainu yn cael ei throsi gan Priestland.
Ond y Gweilch gafodd y gair olaf gyda'r eilydd Jamie Nutbrown yn sleifio drwy amddiffyn bregus y Scarlets i groesi am seithfed cais gyda Hook yn ei throsi.
Gweilch: Barry Davies; Nikki Walker, Tommy Bowe, James Hook, Richard Fussell; Dan Biggar, Mike Phillips; Duncan Jones, Richard Hibbard, Adam Jones, Ryan Jones, Alun Wyn Jones (capt), Jerry Collins, Marty Holah, Jonathan Thomas.
Eilyddion: Huw Bennett, Paul James, Craig Mitchell, Ian Evans, Justin Tipuric, Jamie Nutbrown, Andrew Bishop, Sonny Parker.
Scarlets: Dan Newton; Morgan Stoddart, Gareth Maule, Regan King, Sean Lamont; Rhys Priestland, Martin Roberts; Iestyn Thomas, Matthew Rees (capt), Simon Gardiner, Jonny Fa'amatuainu, Dominic Day, John Turnbull, Jonathan Edwards, Ben Morgan.
Eilyddion: Ken Owens, Rhodri Jones, Phil John, Rob McCusker, David Lyons, Tavis Knoyle, Jonathan Davies, Lee Williams.
Dyfarnwr: James Jones (URC)
