Roedd y llinell gais o fewn cyrraedd yr ymwelwyr yn y munudau olaf, ond gafodd Morgan Stoddart ei lorio o'r tu ôl gyda Daniel Evans yn disgwyl am bas tu allan iddo. Adeiladodd Munster fantais o 27-16 wedi 51 munud wrth sgorio dau gais mewn tri munud - a hynny gyda 14 dyn yn unig ar y cae yn dilyn y cerdyn melyn i Peter O'Mahony. Taclo gwan gan y Scarlets yng nghanol cae adawodd i Sam Tuitupou a Barry Murphy groesi. Ond brwydrodd y Scarlets yn ôl wrth i'r capten Johnathan Edwards groesi, roedd y bwlch i lawr i bwynt yn dilyn gôl gosb Rhys Priestland gyda 13 munud i fynd. Stoddart ei hun dorrodd drwy'r amddiffyn cartref i greu'r cyfle olaf dau funud o'r diwedd, ond collwyd y cyfle wrth iddo anelu at y llinell gais yn hytrach na phasio i Evans. Cyfartal 13-13 oedd hi ar yr hanner wedi cais gyntaf Edwards a chiciau Priestland. Paul Warwick sgoriodd holl bwyntiau Munster gyda chais, trosiad a dwy gôl gosb.
 | 
