Seren y gêm Toby Faletau a Wayne Evans groesodd am geisiau i'r Dreigiau wrth i'r Gweilch, oedd heb bymtheg chwaraewr amlwg, golli am yr ail gêm yn olynol.
A dyma oedd y tro cyntaf yr oedd y Gweilch wedi colli gartref ers deuddeg gêm.
Yr ymwelwyr, oedd heb ennill oddi cartref yn erbyn tîm arall o Gymru ers Medi 2007, aeth ar y blaen gyda Jason Tovey yn llwyddiannus gyda gôl gosb.
Methodd Gareth Owen gyda chic i unioni'r sgôr ond fe lwyddodd Dai Flanagan, ar ôl ymgymryd â'r dyletswyddau cicio, i wneud hynny wedi hanner awr.
A'r Dreigiau oedd i sgorio cais agoriadol y noson gyda Toby Faletau yn croesi am gais arbennig yn y gornel er ymdrechion gorau'r Gweilch.
Ni lwyddodd Tovey gyda'r trosiad canlynol wrth i'w gic daro'r postyn ond y Dreigiau oedd ar y blaen 8-3 ar yr egwyl.
Roedd safon y chwarae yn ystod yr hanner cyntaf wedi bod yn wael, er doedd y glaw trwm ddim wedi gwneud pethau'n hawdd i'r naill dîm.
Ond o fewn dau funud i'r ail ddechrau yr oedd y Gweilch wedi taro'n ôl.
Cafwyd fflach o ysbrydoliaeth gan gyn asgellwr y Dreigiau, Richard Fussell, dyma'n datgloi'r amddiffyn i alluogi Gareth Owen i groesi o dan y pyst.
Llwyddodd Owen gyda'r trosiad i roi'r tîm cartref ar y blaen am y tro cyntaf yn y gêm.
Ond o fewn dim roedd yr ymwelwyr yn ôl ar y blaen gyda'r Gweilch yn talu'n ddrud am ddiffyg disgyblaeth wrth i Tovey sgorio'r gôl gosb.
Methodd Flanagan gyfle i roi'r Gweilch yn ôl ar y blaen gyda'i gic gosb yn profi'n rhy fyr cyn iddo lwyddo rhai munudau yn ddiweddarach i adfer mantais ei dim.
Pedwar munud yn ddiweddar fe gafodd Tovey gyfle i roi'r ymwelwyr yn ôl ar y blaen ond fe fethodd gyda'i gic gosb.
Ond roedd gwell i ddod i dîm Paul Turner yn fuan wedi hynny wrth i Wayne Evans sleifio ar yr ochr dywyll cyn plymio drosodd yn rhwydd am ail gais y Dreigiau.
Roedd trosiad Jason Tovey yn llwyddiannus ac roedd gan y Dreigiau fantais o bum pwynt gydag ychydig dros chwarter awr yn weddill.
Fe ddaeth Tom Willis, capten y Dreigiau, ymlaen fel eilydd yn ystod yr ail hanner ar gyfer ei gêm cyntaf ers dros fis.
Roedd y bwlch lawr i ddau bwynt yn unig wedi 68 munud gydag Owen yn llwyddiannus gyda chic gosb.
Prin funud yr oedd y bwlch lawr i ddau bwynt wrth i Tovey adfer y fantais o bum bwynt o blaid y Dreigiau gyda chic gosb rhwydd o flaen y pyst.
Fe brofodd hynny i fod yn ddigon i dîm Paul Turner wrth iddynt sicrhau eu buddugoliaeth gyntaf erioed oddi cartref yn erbyn y Gweilch.
Mae'r canlyniad yn golygu bod y Gweilch yn disgyn i'r seithfed safle yng Nghynghrair Magners tra bod y Dreigiau yn nawfed.
Gweilch: Gareth Owen; Nikki Walker, Sonny Parker, Ashley Beck, Richard Fussell; Dai Flanagan, Jamie Nutbrown; Ryan Bevington, Mefin Davies, Craig Mitchell, Andy Lloyd, Ian Evans, Tom Smith, Marty Holah, Jerry Collins (capt).
Eilyddion: Richard Hibbard, Duncan Jones, Cai Griffiths, Conor McInerney, Justin Tipuric, Rhys Webb, Tom Isaacs, Barry Davies.
Dreigiau: Pat Leach; Adam Hughes, Tom Riley, Ashley Smith, Nathan Brew; Jason Tovey, Wayne Evans; Phil Price, Steve Jones, Nigel Hall, Luke Charteris (capt), Rob Sidoli, Andrew Coombs, Gavin Thomas, Toby Faletau.
Eilyddion: Tom Willis, Hugh Gustafson, Pat Palmer, Scott Morgan, Robin Sowden-Taylor, Shaun Connor, James Leadbeater, Matthew Jones.
Dyfarnwr: Dave Pearson (Lloegr)
