Fe gafodd y Gweilch y dechrau gorau posib gyda Tommy Bowe yn croesi am gais - ei 18fed yn Ewrop - i roi ei dim ar y blaen wedi pedwar munud. Er i Dan Biggar fethu gyda'r trosiad fe gyfrannodd y maswr ifanc bedair gôl gosb i'r Gweilch yn ystod yr hanner cyntaf.
Fe gafodd diffyg disgyblaeth y Gweilch ei gosbi gyda Ryan Lamb yn llwyddiannus gyda dwy gôl gosb i'r ymwelwyr.
Ar ddechrau'r ail hanner fe groesodd Sailosi Tagicakibau am gais i'r Gwyddelod yn dilyn rhyng-gipiad gyda throsiad llwyddiannus Lamb yn lleihau'r fantais.
Ond roedd ail gais y Gweilch yn wefreiddiol gyda Shane Williams yn croesi yn y gornel wedi cic a chwrs dros 80 llath.
Dyma oedd cais rhif 105 i Williams dros ei glwb a'i wlad ar achlysur ei hanner canfed gêm dros y Gweilch yng Nghwpan Heineken.
Llwyddodd Hook, oedd wedi ymgymryd â'r dyletswyddau cicio wedi i Biggar ymadael a'r maes, gyda'r trosiad cyn i'w gôl gosb sicrhau'r fuddugoliaeth.
Gorffennodd y Gweilch y gêm gyda 14 dyn wedi i Jerry Collins weld y cerdyn melyn gydag wyth munud yn weddill.
Ond roeddynt wedi gwneud digon i ymestyn eu rhediad heb golli yn y gystadleuaeth yn Stadiwm Liberty i bum mlynedd.
Gweilch: Lee Byrne; Tommy Bowe, Andrew Bishop, James Hook, Shane Williams; Dan Biggar, Mike Phillips; Paul James, Richard Hibbard, Adam Jones, Ryan Jones, Alun Wyn Jones (capt), Jerry Collins, Marty Holah, Jonathan Thomas.
Eilyddion: Huw Bennett, Ryan Bevington, Craig Mitchell, Ian Gough, Justin Tipuric, Jamie Nutbrown, Gareth Owen, Nikki Walker.
Gwyddelod Llundain: Topsy Ojo; Jonathan Joseph, Seilala Mapusua, Daniel Bowden, Sailosi Tagicakibau; Ryan Lamb, Paul Hodgson; Clarke Dermody (capt), James Buckland, Faan Rautenbach, Nick Kennedy, Bob Casey, Kieran Roche, Chris Hala'ufia, George Stowers.
Eilyddion: David Paice, Dan Murphy, Alex Corbisiero, Matt Garvey, Gary Johnson, Chris Malone, Elvis Seveali'i, Darren Allinson.
Dyfarnwr: Peter Fitzgibbon (Iwerddon).
