Ar ôl ildio dau gais o fewn wyth munud fe darodd y Gleision yn ôl wedi'r egwyl wrth i Bradley Davies a Richie Rees ateb ceisiau cynnar Shane Jennings a Isa Nacewa i'r tim cartref.
Ond ar ôl i Dan Parks roi'r ymwelwyr ar y blaen gyda'i drydydd gol gosb ychydig mwy na chwarter awr yn weddill fe diriodd Fergus McFadden a Ian Madigan i selio'r fuddugoliaeth.
Mae'r Gleision yn parhau i aros felly am eu buddugoliaeth gyntaf erioed yn Nulyn.
Roedd cais agoriadol y capten Jennings yn un dadleuon gan fod y dyfarnwr i'w weld wedi ymyrryd yn anfwriadol ar ymgais Deiniol Jones i daclo Isaac Boss yn gynharach yn y symudiad.
Ond doedd dim amheuaeth ynglŷn ag ail gais y Gwyddelod wrth i'r asgellwr Isa Nacewa orffen symudiad syml ond effeithiol ymhlith yr olwyr.
Fe darodd y Gleision yn ôl wrth i Dan Parks gosbi'r tîm cartref gyda dwy gôl gosb.
Ond gyda sgrym yr ymwelwyr o dan bwysau cynyddol, fe laniodd Nacewa dwy gôl gosb ei hun i ymestyn y fantais i 20-6 ar yr egwyl.
Wedi deg munud o'r ail-hanner fe wrthododd y Gleision gyfle am driphwynt ar ôl i Leinster atal y bêl ar ôl atal rhediad yr asgellwr Richard Mustoe yn dilyn gwrthymosodiad effeithiol o linell 22 eu hunain.
Ac fe dalodd y penderfyniad i fynd am y llinell ar ei ganfed pan lwyddodd y clo Bradley Davies yn wych i ymestyn ei fraich er mwyn tirio am yr ail benwythnos yn olynol yn dilyn gwaith da gan y blaenwyr.
Llwyddodd Parks gyda'r trosiad i ddod a'i dîm o fewn trosgais i'rGwyddelod, 20-13.
Ar ôl llwyddo i wrthsefyll sgrym ar linell 5 metr eu hunain fe darodd y Gleision yn ôl yn wych gyda chais gwefreiddiol wedi awr o chwarae i ddod ar sgôr yn gyfartal
Fe gasglodd Chris Chekaj y bel yn ei hanner ei hun, ac ar ôl casglu ei gic gwta fe ailgylchwyd y bêl i ganiatáu Casey Laulau i fwydo'r amlwg Bradley Davies.
Fe sythodd y clo'r llinell yn effeithiol cyn i Mustoe a Xavier Rush gyfuno'n hyfryd i ryddhau Richie Rees gan alluogi'r mewnwr i frasgamu dros y llinell gais.
Unwaith eto roedd ymgais Parks ar y pyst yn gywir ac fe ychwanegodd y maswr triphwynt arall i roi ei dîm ar y blaen 20-23 am y tro cyntaf gyda 17 munud yn weddill.
Ond gyda'r Gleision unwaith eto o dan bwysau fe dorrodd Fergus McFadden drwy'r amddiffyn blinedig i adennill y fantais ac fe lwyddodd Nacewa gyda'r trosiad gyda 10 munud yn weddill.
Ac yn yr eiliadau olaf fe amddifadwyd y Gleision o bwynt bonws haeddiannol pan fanteisiodd Ian Madigan ar dacl llipa Parks i dirio am gais olaf y noson.
Leinster: L Fitzgerald; S Horgan, B O'Driscoll, F McFadden, I Nacewa; I Madigan, I Boss; H van der Merwe, R Strauss, M Ross, N Hines, E O'Donoghue, S O'Brien, S Jennings (capt), J Heaslip.
Eilyddion: J Fogarty yn lle Strauss (55), C Healy Van der Merwe (61), S Shawe am Ross (67), M Galarza yn lle O'Donoghue (78), D Ryan yn lle Jennings (61), E Reddan yn lle Boss (53), E O'Malley, yn lle O'Driscoll (61), D Kearney yn lle Horgan (49).
Gleision: C Czekaj; R Mustoe, C Laulala, D Hewitt, T James; D Parks, R Rees; T Davies, R Thomas, S Andrews, B Davies, D Jones, M Paterson, S Warburton, X Rush (capt).
Eilyddion: R Williams, J Yapp yn lle Andrews (49), T Filise T. Davies (41), J Down yn lle Jones (58), B White yn lle Warburton (71), M Williams, C Sweeney, G Evans yn lle Laulala (72).
Torf: 15,890
Dyfarnwr: Andy Macpherson (Alban).
